பாஸ்கா காலத்தின் நான்காம் ஞாயிறு 26.04.2026

 பாஸ்கா காலத்தின் நான்காம் ஞாயிறு 26.04.2026

இன்றைய நற்செய்தி வாசகங்கள்

திருத்தூதர் பணிகள் 2:14அ, 36-41
1 பேதுரு 2:20ஆ-25
யோவான்: 10:1-10

திருப்பலி முன்னுரை:

அன்புச் சகோதரர்களே, சகோதரிகளே, உயிர்த்த ஆண்டவர் இயேசுவின் உடனிருப்பைக் கொண்டாடும் பாஸ்கா காலத்தின் நான்காம் ஞாயிறு வழிபாட்டிற்கு (உங்களை அன்போடு வரவேற்கிறோம்.) இன்று திருச்சபை "நல்ல ஆயன் ஞாயிறைச் சிறப்பிக்கின்றது.
இன்றைய நற்செய்தியில், இயேசு தம்மை ஒரு "நல்ல ஆயனாகவும்", ஆடுகள் உள்ளே நுழையும் "வாயிலாகவும்" உருவகப்படுத்துகிறார். ஒரு நல்ல ஆயன் தன் ஆடுகளைப் பெயர் சொல்லி அழைக்கிறார்; அவற்றிற்காகத் தன் உயிரையே கொடுக்கிறார். நாம் அவருடைய மந்தையைச் சார்ந்த ஆடுகள். உலகில் பல குரல்கள் நம்மைக் திசைதிருப்ப முயன்றாலும், நமது உண்மையான ஆயனின் குரலை மட்டும் கேட்டுப் பின்பற்றிட இன்று நாம் அழைக்கப்படுகிறோம்.
மேலும், இன்று திருச்சபையின் அழைத்தல்களுக்காகச் செபிக்கும் நாள். நல்ல ஆயனின் குரலைக் கேட்டு, இறைப்பணி செய்யப் பலர் முன்வர வேண்டும் என்று சிறப்பாக வேண்டுவோம். நாம் அனைவரும் அந்த நல்ல ஆயனின் பராமரிப்பில் பாதுகாப்புடனும், நிறைவான வாழ்வுடனும் வாழத் தேவையான அருளை வேண்டி இந்தப் பலியில் இணைவோம்.

முதல் வாசக முன்னுரை (திருத்தூதர் பணிகள் 2:14, 36-41)

மனமாற்றத்திற்கான அழைப்பு. புனித பேதுருவின் முதல் உரையைக் கேட்ட மக்கள், "சகோதரர்களே, நாங்கள் என்ன செய்ய வேண்டும்?" என்று இதயத்தில் குத்தப்பட்டவர்களாய்க் கேட்கிறார்கள். அதற்குப் பேதுரு, "மனம் மாறுங்கள், இயேசுவின் பெயரால் திருமுழுக்குப் பெறுங்கள்" என்று அறிவுறுத்துகிறார். அன்று மூவாயிரம் பேர் அந்த ஆயனின் மந்தையில் இணைந்தது போல, நாமும் நம் பாவ வழிகளை விடுத்து ஆண்டவரிடம் திரும்பி வர இவ்வாசகம் நமக்கு அழைப்பு விடுக்கிறது. இவ்வாசகத்திற்குச் செவிமடுப்போம்.

பதிலுரைப்பாடல்

பல்லவி: ஆண்டவரே என் ஆயர்; எனக்கேனும் குறையில்லை.
திருப்பாடல் 23: 1-3a. 3b-4. 5. 6.

ஆண்டவரே என் ஆயர்; எனக்கேனும் குறையில்லை.  பசும்புல் வெளிமீது எனை அவர் இளைப்பாறச் செய்வார்; அமைதியான நீர்நிலைகளுக்கு எனை அழைத்துச் செல்வார்.  அவர் எனக்குப் புத்துயிர் அளிப்பார்.  பல்லவி

தம் பெயர்க்கேற்ப எனை நீதி வழி நடத்திவிடுவார்.  மேலும், சாவின் இருள்சூழ் பள்ளத்தாக்கில் நான் நடக்க நேர்ந்தாலும், நீர் என்னோடு இருப்பதால் எத்தீங்கிற்கும் அஞ்சின்; உம் கோலும் நெடுங்கழியும் என்னைத் தேற்றும்.  பல்லவி

என்னுடைய எதிரிகளின் கண் முன்னே எனக்கொரு விருந்தினை ஏற்பாடு செய்கின்றீர்; என் தலையில் நறுமணத் தைலம் பூசுகின்றீர்; எனது பாத்திரம் நிரம்பி வழிகின்றது.  பல்லவி

உண்மையாகவே, என் வாழ்நாள் எல்லாம் உம் அருள் நலமும் பேரன்பும் என்னைப் புடைசூழ்ந்து வரும்; நானும் ஆண்டவரின் இல்லத்தில் நெடுநாள் வாழ்ந்திருப்பேன்.  பல்லவி 

இரண்டாம் வாசக முன்னுரை (1 பேதுரு 2:20-25)

நம் ஆன்மாக்களின் ஆயராகிய கிறிஸ்து. கிறிஸ்து நமக்காகத் துன்புற்று நமக்கு ஒரு முன்மாதிரியை விட்டுச் சென்றார். நாம் சிதறிப்போன ஆடுகளைப் போல இருந்தோம்; ஆனால் இப்போது நம் ஆன்மாக்களின் ஆயரும் கண்காணிப்பாளருமான அவரிடம் திரும்பி வந்துள்ளோம் என்று புனித பேதுரு கூறுகிறார். அவர் தம் காயங்களால் நமக்குக் குணமளித்தார் என்பதை உணர்த்தும் இவ்வாசகத்திற்குப் பக்தி உணர்வுடன் செவிமடுப்போம்.

நற்செய்திக்கு முன் வாழ்த்தொலி

அல்லேலூயா, அல்லேலூயா! நல்ல ஆயன் நானே. நானும் என் ஆடுகளை அறிந்திருக்கிறேன்; என் ஆடுகளும் என்னை அறிந்திருக்கின்றன, என்கிறார் ஆண்டவர். அல்லேலூயா

நம்பிக்கையாளரின் மன்றாட்டு

1. எங்கள் திருத்தந்தை லியோ, ஆயர்கள், குருக்கள், துறவறத்தார் மற்றும் பொதுநிலையினராகிய நாங்கள் அனைவரும், அச்சங்கள் அனைத்திலிருந்தும் விடுதலை பெற்றவர்களாய் “கடவுள் இயேசுவை உயிர்த்தெழச் செய்தார். இதற்கு நாங்கள் அனைவரும் சாட்சிகள்” எனத் துணிவுடன் எடுத்துரைத்த பேதுருவைப் போல, உயிர்ப்பின் உயிருள்ள சாட்சிகளாகவும், துடிப்புள்ள திருஅவையாகவும் வாழ வேண்டுமென்று, இறைவா உம்மை மன்றாடுகிறோம்.

2. கடவுளின் வலப்பக்கத்துக்கு உயர்த்தப்பட்டு, வாக்களிக்கப்பட்ட தூய ஆவியைத் தம் தந்தையிடமிருந்து பெற்றுத் தரவல்லவரான உயிர்த்த இயேசு, உலகின் தலைவர்கள் அனைவரையும், பகைமை, வன்மம், வெறுப்பு போன்ற பாதாளங்களிலிருந்து தூக்கிவிட்டு, போர்களில்லா அமைதியான சூழலுக்கு அழைத்துச்செல்ல வேண்டுமென்றும், அனைத்துவிதமான நெருக்கடிகளிலிருந்தும் இந்த உலகு விடுதலை பெற வேண்டுமென்றும், இறைவா உம்மை மன்றாடுகிறோம்.

3. “மரணம் அவரைத் தன் பிடியில் வைத்திருக்க முடியவில்லை” என்கிற முதல்வாசகம் இயேசுவுக்கு மட்டுமல்லாது எங்களுக்கும் பொருந்தும் என்பதை உணர்ந்து மன்றாடுகிறோம். எங்கள் குடும்பங்களிலும், அன்பியங்களிலும், பங்குகளிலுமிருந்து மரித்துப்போன அனைவர் மீதும், உலகின் பல்வேறு இடங்களில் நடந்துவருகிற போர்களாலும் தாக்குதல்களாலும் உயிரிழக்க நேரிடும் அனைவரின் மீதும், உமது உயிர்ப்பின் வல்லமை தங்க வேண்டுமென்று, இறைவா உம்மை மன்றாடுகிறோம்.

4. ஆளைப் பார்த்தல்ல, அவரவர் செயல்களின்படியே தீர்ப்பு வழங்குகிற உம்முடைய மக்களாகிய நாங்கள், இந்த வாரம் நடைபெறவுள்ள சட்டமன்ற தேர்தலிலே, “எங்களை விடுவிக்கக் கொடுக்கப்பட்ட விலை பொன்னும் வெள்ளியும் அல்ல; மாசு மறுவற்ற கிறிஸ்துவின் உயர் மதிப்புள்ள இரத்தம்” என்கிற உண்மையை உணர்ந்தவர்களாய், யாருக்கும் விலை போகாமல், எந்தவிதமான கவர்ச்சிக்கும்   மதிமயக்கத்திற்கும் இடம் தராமல், மதச்சார்பற்ற, மனிதாபிமானமிக்க, சமூக நீதியை நிலைநாட்டக்கூடிய தலைவர்களைத் தேர்ந்தெடுக்க வேண்டுமென்று, இறைவா உம்மை மன்றாடுகிறோம்.

5. இங்கே கூடியுள்ள நாங்கள் அனைவரும், இறைத்திட்டத்தையும், இறைவனின் வல்ல செயல்களையும் உணர இயலாத மந்த உள்ளத்தினராக இல்லாமல், இறைவார்த்தையும், திருஅப்பமும் பிடப்படுகிற திருப்பலியில், உம்மை முழுமையாய் கண்டுணரவும், 'எம்மோடு தங்கும்' என வேண்டி உம்மை எப்போதும் எங்கள் வாழ்க்கையில் கொண்டு வாழவும், நாங்கள் கண்டுணர்ந்த உம்மைப் பிறரோடு பகிரவும் வேண்டுமென்று, இறைவா உம்மை மன்றாடுகிறோம்.