Thursday, November 12, 2026

அனைத்துலக அரசராகிய கிறிஸ்து பெருவிழா 22/11/2026

அனைத்துலக அரசராகிய கிறிஸ்து பெருவிழா 22/11/2026

(வழிபாட்டு ஆண்டின் 34-ஆம் மற்றும் இறுதி ஞாயிறு)


திருப்பலி முன்னுரை

பாசத்திற்குரிய இறைமக்களே! இன்று நாம் வழிபாட்டு ஆண்டின் இறுதி ஞாயிறை அனைத்துலக அரசராகிய கிறிஸ்து பெருவிழாவாக மிக விமரிசையாகக் கொண்டாடுகிறோம்.
இன்று நாம் போற்றும் அரசர், உலக அரசர்களைப் போல அதிகாரத்தாலும் ஆயுதங்களாலும் ஆள்பவர் அல்ல; மாறாக, சிலுவையில் தம் உயிரைத் தந்து, அன்பினாலும் சேவையினாலும் ஆள்பவர். இன்றைய திருவழிபாடு கிறிஸ்துவை ஒரு "நல்ல ஆயராகவும்", "நீதியுள்ள நடுவராகவும்" நமக்கு அறிமுகப்படுத்துகிறது.
நற்செய்தியில், இறுதித் தீர்ப்பின் காட்சியை இயேசு விளக்குகிறார். "மிகச் சிறியவர்களாகிய என் சகோதரர் சகோதரிகளுக்கு நீங்கள் செய்ததெல்லாம் எனக்கே செய்தீர்கள்" என்று கூறும் ஆண்டவர், அண்டை இருப்பவருக்குச் செய்யும் சேவையே அரசராகிய கிறிஸ்துவுக்குச் செய்யும் வழிபாடு என்பதைத் தெளிவுபடுத்துகிறார். நாம் கிறிஸ்துவின் அரசுக்கு உட்பட்ட குடிமக்களாக, ஏழை எளியோரிடம் அன்பு காட்டுகிறோமா? எனச் சிந்திக்க அழைக்கப்படுகிறோம். கிறிஸ்துவின் அன்பு ஆட்சி எங்கும் நிலவ வரம் வேண்டி, இத்திருப்பலியில் பக்தியுடன் பங்கேற்போம்.

முதல் வாசக முன்னுரை :-

ஆண்டவராகிய கடவுள் தாமே ஒரு நல் ஆயராக வந்து தம் ஆடுகளைத் தேடிக் கண்டுபிடிப்பார் என்று எசேக்கியேல் இறைவாக்கினர் கூறுகிறார். காணாமல் போனதைத் தேடி, காயப்பட்டதற்குக் கட்டுப்போட்டு, நலிந்ததைத் திடப்படுத்தும் அன்பு நிறைந்த அரசராகிய இறைவனை இவ்வாசகத்தில் காண்போம்.

 பதிலுரைப்பாடல் :-

ஆண்டவரே என் ஆயர்; எனக்கேதும் குறையில்லை
திருப்பாடல் 23: 1-2. 3. 5. 6
ஆண்டவரே என் ஆயர்; எனக்கேதும் குறையில்லை. ஆண்டவரே என் ஆயர்; எனக்கேதும் குறையில்லை.  பசும் புல்வெளிமீது எனை அவர் இளைப்பாறச் செய்வார்; அமைதியான நீர்நிலைகளுக்கு எனை அழைத்துச் செல்வார். பல்லவி
அவர் எனக்குப் புத்துயிர் அளிப்பார்; தம் பெயர்க்கேற்ப எனை நீதிவழி நடத்திடுவார். பல்லவி 
என்னுடைய எதிரிகளின் கண் முன்னே எனக்கொரு விருந்தினை ஏற்பாடு செய்கின்றீர்; என் தலையில் நறுமணத் தைலம் பூசுகின்றீர்; எனது பாத்திரம் நிரம்பி வழிகின்றது. பல்லவி
உண்மையாகவே, என் வாழ்நாள் எல்லாம் உம் அருள் நலமும் பேரன்பும் என்னைப் புடைசூழ்ந்து வரும்; நானும் ஆண்டவரின் இல்லத்தில் நெடுநாள் வாழ்ந்திருப்பேன். பல்லவி

இரண்டாம் வாசக முன்னுரை 

கிறிஸ்து சாவிலிருந்து உயிர்த்தெழுந்து, எல்லா வல்லமைகளையும் அதிகாரங்களையும் அழித்து, தந்தையாம் கடவுளிடம் ஆட்சியை ஒப்படைப்பார் என்று புனித பவுல் விளக்குகிறார். இறுதியில் கடவுளே அனைத்திலும் அனைத்துமாய் இருப்பார் என்ற நம்பிக்கையைத் தரும் இவ்வாசகத்திற்குச் செவிசாய்ப்போம். 

நற்செய்திக்கு முன் வாழ்த்தொலி

அல்லேலூயா, அல்லேலூயா! ஆண்டவர் பெயரால் வருகிறவர் போற்றப்பெறுக! வரவிருக்கும் நம் தந்தை தாவீதின் அரசு போற்றப்பெறுக! . அல்லேலூயா.

நம்பிக்கையாளரின் மன்றாட்டுகள்

1. நல்லாயனாகிய இறைவா, திருவழிபாட்டு ஆண்டின் இறுதி ஞாயிறாகிய இன்று, தாயாம் திருஅவைக்காகவும், அதன் தலைமைப் பொறுப்பில் இருக்கும் எங்கள் திருத்தந்தை லியோ, ஆயர்கள், அருள் பணியாளர்கள், துறவியர், ஆகிய அனைவருக்காகவும் மன்றாடுகிறோம். “நானே என் மந்தையைத் தேடிச் சென்று பேணிக் காப்பேன்” என்கிற முதல் வாசக மனநிலையோடு அவர்கள் எங்களை வழிநடத்தவும், இறைமக்கள் ஆகிய நாங்கள் அனைவரும் அவர்களுக்குப் பணிந்து நடக்கவும், அருள்தர வேண்டுமென்று, இறைவா உம்மை மன்றாடுகிறோம்.
2. இயேசு கிறிஸ்து அனைத்துலக அரசர் எனும் விழாவினைக் கொண்டாடுகிற வேளையில், உலகாளும் தலைவர்களுக்காகவும் எம்நாட்டினையும், மாநிலத்தையும் ஆட்சி செய்வோருக்காகவும் மன்றாடுகிறோம், நீதியுடனும், நேர்மையுடனும், அனைவருக்குமான அரசுகளை நடத்தி, அனைத்து மக்களும் அமைதியுடனும், மகிழ்ச்சியுடனும், மனநிம்மதியுடனும் வாழ்ந்திட வகைசெய்ய வேண்டுமென்று, இறைவா உம்மை மன்றாடுகிறோம்.
3. ‘ஆண்டவரே என் ஆயர்; எனக்கேதும் குறையில்லை’ என்றும் ‘என் வாழ்நாள் எல்லாம் உம் அருள் நலமும் பேரன்பும் என்னைப் புடைசூழ்ந்து வரும்’ என்றும் சொல்லவும், சொல்வதை நம்பவும், நம்பிக்கைக்கு ஏற்ப அச்சமின்றி வாழவும், எங்கள் அனைவருக்கும், குறிப்பாக இளைஞர் இளம்பெண்களுக்கும், குழந்தைகள் அனைவருக்கும் திடம் தர வேண்டுமென்றும், நீர் தாமே ஆயனாய் இருந்து, பசும் புல்வெளி, அமைதியான நீர்நிலை போன்ற தெளிந்த எதிர்காலத்திற்கும் வழிநடத்திச் செல்ல  வேண்டுமென்று, இறைவா உம்மை மன்றாடுகிறோம்.
4. இறந்துபோன அடியார்களுக்காகவும், மரித்த ஆன்மாக்களுக்காகவும் சிறப்பாக ஜெபிக்கிற இந்த மாதத்தில், எங்கள் குடும்பங்களிலும், அன்பியங்களிலும், பங்கிலும் இருந்து மறைந்து போன அனைவரும் ‘ஆண்டவரின் இல்லத்தில் நெடுநாள் வாழ்ந்திருப்பேன்’ என்கிற சங்கீதக்காரரின் கூற்றுப்படி நிலைவாழ்வை அனுபவிக்கவும், யாருமே நினையாத ஆன்மாக்களும் உம் பேரிரக்கத்தால் ஈடேற்றம் பெறவும், இறைவா உம்மை மன்றாடுகிறோம்.
5. இங்கே கூடியுள்ள நாங்கள் அனைவரும் ‘‘தந்தையிடமிருந்து ஆசி பெற்றவர்களே, வாருங்கள்; உலகம் தோன்றியது முதல் உங்களுக்காக ஏற்பாடு செய்யப்பட்டிருக்கும் ஆட்சியை உரிமைப் பேறாகப் பெற்றுக் கொள்ளுங்கள்’ என்கிற உமது ஆசிமொழியினை கேட்கின்ற வகையில், இறைபக்தியாலும், இரக்கச் செயல்களாலும் எங்கள் வாழ்க்கையை செம்மையாக்கி, உம்மை வந்தடைய வரம்தர   வேண்டுமென்று, இறைவா உம்மை மன்றாடுகிறோம்.  

https://anbinmadal.org

Print Friendly and PDF

Sunday, November 8, 2026

பொதுக்காலம் ஆண்டின் 33ஆம் ஞாயிறு 15/11/2026

பொதுக்காலம் ஆண்டின் 33ஆம் ஞாயிறு 15/11/2026


இன்றைய நற்செய்தி வாசகங்கள்

நிதிமொழிகள் 31: 10-13,41-43,.45,54-571
தெசலோனிக்கர் 5: 1-6
மத்தேயு 25: 14-30

திருப்பலி முன்னுரை

பாசத்திற்குரிய இறைமக்களே! இன்று நாம் பொதுக்காலத்தின் 33-ஆம் ஞாயிறு வழிபாட்டைக் கொண்டாடுகிறோம்.

இன்றைய நற்செய்தியில் "தாலந்து உவமை" வழியாக இறைவன் நமக்குத் தந்துள்ள கொடைகளைப் பற்றியும், அவற்றுக்கு நாம் சொல்ல வேண்டிய கணக்கைப் பற்றியும் இயேசு போதிக்கிறார். இறைவன் நம் ஒவ்வொருவருக்கும் வெவ்வேறு திறமைகளையும், ஆற்றல்களையும் தந்துள்ளார். அவற்றை மண்ணில் புதைத்து வைப்பவர் அல்ல, மாறாக துணிச்சலோடு செயல்பட்டு அவற்றைப் பெருக்குபவரையே ஆண்டவர் பாராட்டுகிறார்.

முதல் வாசகத்தில், கடின உழைப்பும் அஞ்சா நெஞ்சமும் கொண்ட ஒரு பெண்மணி எவ்வாறு தன் இல்லத்திற்கு ஆசீர்வாதமாகத் திகழ்கிறார் என்பதை வாசிக்கிறோம். இரண்டாம் வாசகத்தில், ஆண்டவரின் நாள் திருடனைப் போல வரும் என்றும், நாம் இருளின் பிள்ளைகளாக அல்ல, ஒளியின் பிள்ளைகளாக விழிப்புடன் இருக்க வேண்டும் என்றும் பவுல் அடியார் எச்சரிக்கிறார். நம்மிடம் உள்ள தாலந்துகளை இறைமாட்சிக்காகவும், பிறர் நலனுக்காகவும் பயன்படுத்துகிறோமா? எனச் சிந்திக்க அழைக்கப்படுகிறோம். அந்தப் பொறுப்புணர்வுடன் இத்திருப்பலியில் பக்தியுடன் பங்கேற்போம்.

முதல் வாசக முன்னுரை:-

நற்பண்புகள் கொண்ட ஒரு பெண்மணி முத்தை விட விலையுயர்ந்தவர். அவர் தன் கைகளின் உழைப்பினால் குடும்பத்தை உயர்த்துவதுடன், ஏழைகளுக்கும் எளியோருக்கும் உதவி செய்கிறார். வெளித்தோற்றமான அழகை விட, ஆண்டவரிடம் பக்தி கொண்டிருப்பதே மேலானது என்பதை விளக்கும் இவ்வாசகத்தைக் கேட்போம்.

பதிலுரைப்பாடல்:-

பல்லவி: ஆண்டவருக்கு அஞ்சி அவர் வழி நடப்போர் பேறுபெற்றோர்!

திபா 128: 1-2. 3. 4-5

ஆண்டவருக்கு அஞ்சி அவர் வழிகளில் நடப்போர் பேறுபெற்றோர்! உமது உழைப்பின் பயனை நீர் உண்பீர்! நீர் நற்பேறும் நலமும் பெறுவீர்! பல்லவி

உம் இல்லத்தில் உம் துணைவியார் கனிதரும் திராட்சைக் கொடிபோல் இருப்பார்; உண்ணும் இடத்தில் உம் பிள்ளைகள் ஒலிவக் கன்றுகளைப் போல் உம்மைச் சூழ்ந்திருப்பர்.பல்லவி

ஆண்டவருக்கு அஞ்சி நடக்கும் ஆடவர் இத்தகைய ஆசி பெற்றவராய் இருப்பார். ஆண்டவர் சீயோனிலிருந்து உமக்கு ஆசி வழங்குவாராக! உம் வாழ்நாளெல்லாம் நீர் எருசலேமின் நல்வாழ்வைக் காணும்படி செய்வாராக! பல்லவி

இரண்டாம் வாசக முன்னுரை :-

ஆண்டவருடைய நாள் எப்போது வரும் என்று எவருக்கும் தெரியாது. ஆனால் விசுவாசிகளாகிய நாம் இருளுக்குச் சொந்தமானவர்கள் அல்ல; ஒளியின் பிள்ளைகள். எனவே, மற்றவர்களைப் போலத் தூங்கிவிடாமல் விழிப்புடனும் அறிவுத் தெளிவுடனும் இருக்க அழைப்பு விடுக்கப்படும் இவ்வாசகத்திற்குச் செவிசாய்ப்போம்.

நற்செய்திக்கு முன் வாழ்த்தொலி:-

அல்லேலூயா, அல்லேலூயா! நான் உங்களோடு இணைந்து இருப்பது போல நீங்களும் என்னோடு இணைந்து இருங்கள். ஒருவர் என்னுடனும் நான் அவருடனும் இணைந்திருந்தால் அவர் மிகுந்த கனி தருவார். அல்லேலூயா.

நம்பிக்கையாளரின் மன்றாட்டுகள்:-

1. நல்லாயனாம் இறைவா, தாயாம் திருஅவையை வழிநடத்தும் எங்கள் திருத்தந்தை லியோ, ஆயர்கள், அருள் பணியாளர்கள், துறவியர், ஆகிய அனைவரும் தங்களிடம் ஒப்புவிக்கப்பட்ட மேய்ப்புப் பொறுப்பினை தக்கவிதத்தில் நிறைவேற்றவும், இறைமக்கள் ஆகிய நாங்கள் அனைவரும் எங்கள் கடமைகளை தட்டிக்கழிக்காமல் வாழவும், அருள்தர வேண்டுமென்று, இறைவா உம்மை மன்றாடுகிறோம்.

2. அரசருக்கெல்லாம் அரசரே, உலகாளும் தலைவர்களும் எம் நாட்டினையும், மாநிலத்தையும் ஆட்சி செய்வோரும், தங்களிடம் தரப்பட்டுள்ள ஆட்சிப் பொறுப்பினை திறம்பட கையாண்டு, மக்கள் அனைவரையும் அமைதி, சமத்துவம், நிம்மதியான நிறைவாழ்வு நோக்கி வழிநடத்த, வரம் தர வேண்டுமென்று, இறைவா உம்மை மன்றாடுகிறோம்.

3. அன்புருவாகிய இறைவா, உம்மால் உருவாக்கப்பட்ட எங்கள் குடும்பங்களில், குடும்ப உறுப்பினர் ஒவ்வொருவரும், தமக்குரிய பொறுப்பினை உணர்ந்து, ஆண் – பெண் பாகுபாடு மறந்து, தத்தம் கடமைகளை பொறுப்புடன் நிறைவேற்றி, மூத்தோரை மதித்து, பெண்களை மாண்புடன் நடத்தி, சிறியோரை அரவணைத்து, அனைவரையும் அன்பு செய்து, எங்கள் குடும்பங்களை கட்டியெழுப்ப அருள் தர வேண்டுமென்று, இறைவா உம்மை மன்றாடுகிறோம்.

4. நிலைவாழ்வைத் தருகிற இறைவா, இவ்வுலகில் வாழ்ந்து மரித்த அனைவரையும் நீர் கனிவுடன் கண்ணோக்கி, தங்கள் கடமைகளை கருத்தாய் செய்தவர்களுக்கு உமது மாட்சியில் பங்களிக்கவும், அதில் சற்றே தவறியவர்களுக்கு, உமது பேரிரக்கத்தின் பொருட்டு மன்னிப்பைத் தந்து, உமது பேரின்ப வீட்டிற்க்கு அழைத்துக்கொள்ள வேண்டுமென்றும், இறைவா உம்மை மன்றாடுகிறோம்.

5. வாழ்வளிக்கும் வள்ளலே இறைவா, இங்கே கூடியுள்ள நாங்கள் அனைவரும் ‘நன்று. நம்பிக்கைக்குரிய நல்ல பணியாளரே, சிறிய பொறுப்புகளில் நம்பிக்கைக்கு உரியவராய் இருந்தீர். உம் தலைவனாகிய என் மகிழ்ச்சியில் வந்து பங்கு கொள்ளும்’ என்கிற உமது ஆசிமொழியினை கேட்கின்ற வகையில், எங்களுக்கு நீர் தந்துள்ள வாழ்வு, அறிவு, ஆற்றல், திறமைகள் ஆகியவற்றை நன்முறையில் பயன்படுத்தி வாழ்வில் சிறந்தோங்க வேண்டுமென்று, இறைவா உம்மை மன்றாடுகிறோம்.


Monday, November 2, 2026

பொதுக்காலம் ஆண்டின் 32ஆம் ஞாயிறு 08/11/26

பொதுக்காலம் ஆண்டின் 32ஆம் ஞாயிறு 08/11/26


இன்றைய நற்செய்தி வாசகங்கள்

சாலமோனின் ஞானம் 6: 12-16
1 தெசலோனிக்கர் 4: 13-18
மத்தேயு 25: 1-13

திருப்பலி முன்னுரை

பாசத்திற்குரிய இறைமக்களே! இன்று நாம் பொதுக்காலத்தின் 32-ஆம் ஞாயிறு வழிபாட்டைக் கொண்டாடுகிறோம்.

திருச்சபையின் வழிபாட்டு ஆண்டின் இறுதி நாட்களை நெருங்கிக் கொண்டிருக்கும் நாம், இன்றைய திருவழிபாட்டின் வழியாக "விழிப்புணர்வு" மற்றும் "ஆன்மீகத் தயாரிப்பு" குறித்த அழைப்பைப் பெறுகிறோம். இன்றைய நற்செய்தியில், மணமகனின் வருகைக்காகக் காத்திருந்த பத்து கன்னிமியரின் உவமை வழியாக இயேசு நம்மை எச்சரிக்கிறார். மணமகன் வரும்போது கையில் விளக்கும், அதில் ஊற்றுவதற்குப் போதுமான எண்ணெயும் வைத்திருந்த அறிவாளியான கன்னிமியர் மணவறைக்குள் நுழைகிறார்கள்.

விளக்கு என்பது நமது 'விசுவாசம்' என்றால், எண்ணெய் என்பது நமது 'நற்செயல்கள்'. ஆண்டவர் எப்போது வருவார் என்பது நமக்குத் தெரியாது. எனவே, வெறும் பெயரளவு கிறிஸ்தவர்களாக விளக்கை மட்டும் ஏந்தி நிற்காமல், நற்செயல்கள் என்னும் எண்ணெயால் நமது வாழ்வை நிரப்பி, ஆண்டவரின் வருகைக்காக விழிப்புடன் காத்திருக்க அழைக்கப்படுகிறோம். அந்த ஆன்மீக ஞானத்தைப் பெற வரம் வேண்டி, இத்திருப்பலியில் பக்தியுடன் பங்கேற்போம்.

முதல் வாசக முன்னுரை 

ஞானம் என்பது தேடுபவர்களுக்கு எளிதில் கிடைக்கும். அதைப் பெறுவதற்காக விழிப்புடன் இருப்பவர்கள் கவலைகளிலிருந்து விடுபடுவார்கள். ஞானத்தைத் தேடி அலைபவர்களுக்கு அதுவே வழியில் தோன்றி வழிகாட்டும் என்பதை எடுத்துரைக்கும் இவ்வாசகத்தைக் கேட்போம்.

பதிலுரைப்பாடல்

திபா 63: 1. 2-3. 4-5. 6-7

பல்லவி: என் இறைவா! என் உயிர் உம்மீது தாகம் கொண்டுள்ளது.

1.கடவுளே! நீரே என் இறைவன்! உம்மையே நான் நாடுகின்றேன்; என் உயிர் உம்மீது தாகம் கொண்டுள்ளது; நீரின்றி வறண்ட தரிசு நிலம்போல என் உடல் உமக்காக ஏங்குகின்றது. -பல்லவி

2. உம் ஆற்றலையும் மாட்சியையும் காண விழைந்து உம் தூயகம் வந்து உம்மை நோக்குகின்றேன்.   ஏனெனில், உமது பேரன்பு உயிரினும் மேலானது; என் இதழ்கள் உம்மைப் புகழ்கின்றன. -பல்லவி

3. என் வாழ்க்கை முழுவதும் இவ்வண்ணமே உம்மைப் போற்றுவேன்; கைகூப்பி உமது பெயரை ஏத்துவேன். 5 அறுசுவை விருந்தில் நிறைவடைவதுபோல என் உயிர் நிறைவடையும்; என் வாய் மகிழ்ச்சிமிகு இதழ்களால் உம்மைப் போற்றும். -பல்லவி

4.நான் படுத்திருக்கையில் உம்மை நினைப்பேன்; இரா விழிப்புகளில் உம்மைப் பற்றியே ஆழ்ந்து சிந்திப்பேன். ஏனெனில், நீர் எனக்குத் துணையாய் இருந்தீர்; உம் இறக்கைகளின் நிழலில் மகிழ்ந்து பாடுகின்றேன். -பல்லவி

இரண்டாம் வாசக முன்னுரை 

இறந்த விசுவாசிகளைக் குறித்து நாம் நம்பிக்கையற்றவர்களைப் போலத் துயரப்படத் தேவையில்லை. இயேசு உயிர்நாடி எழுந்தது போல, அவரில் மரித்தவர்களும் மீண்டும் உயிர் பெறுவார்கள். ஆண்டவர் வரும்போது நாம் அனைவரும் மேகங்களில் தூக்கிச் செல்லப்பட்டு அவரோடு என்றும் இருப்போம் என்ற ஆறுதலான வார்த்தைகளை இவ்வாசகத்தில் கேட்போம்.

நற்செய்திக்கு முன் வாழ்த்தொலி

அல்லேலூயா, அல்லேலூயா! விழிப்பாய் இருங்கள்; ஆயத்தமாய் இருங்கள். ஏனெனில் நீங்கள் நினையாத நேரத்தில் மானிடமகன் வருவார். அல்லேலூயா.

நம்பிக்கையாளரின் மன்றாட்டுகள்

1. தீப ஒளியின் திருவிழாவினைக் கொண்டாடுகிற இந்த இனிய நாளில், திருஅவையை வழிநடத்தும் எங்கள் திருத்தந்தை லியோ, ஆயர்கள், அருள் பணியாளர்கள், துறவியர், இறைமக்கள் ஆகிய நாங்கள் அனைவரும் ஒளியின் மக்களாய் வாழவும், கிறிஸ்துவே உலகின் ஒளி என்பதை எங்கள் சொல், செயல், வாழ்வின் மூலம் சான்று பகர வேண்டுமென்றும், இறைவா உம்மை மன்றாடுகிறோம்.

2. எங்கள் தாய்த் திருநாட்டின் மக்கள் எல்லோரும் மகிழ்வுடன் தீபாவளித் திருநாளை கொண்டாடுகிற வேளையில் எம்நாட்டிலும் உலகிலும் வன்முறை, தீவிரவாதம், சாதி சமய வேற்றுமை போன்ற இருளின் செயல்கள் யாவும் மடிந்து, அமைதி. நல்லுறவு, அனைவருக்குமான முன்னேற்றம் ஆகிய ஒளியின் விழுமியங்கள் உயர்ந்தோங்க வேண்டுமென்று, இறைவா உம்மை மன்றாடுகிறோம்.

3. “ஞானம் ஒளிமிக்கது; அதன்பால் அன்புகூர்வோர் தளர்ச்சி அடைய மாட்டார்கள்; தனக்குத் தகுதியுள்ளவர்களை ஞானம் தேடிச் செல்கிறது” என்கிற முதல் வாசக கூற்றின்படி, நாங்கள் அனைவரும், குறிப்பாக எம் இளையோரும், பிள்ளைகளும், ஞானத்தைத் தேடும் மக்களாக விளங்கி, சரியான பாதைகளைத் தெரிவு செய்து, தங்கள் கடின உழைப்பாலும், இறை அருளாலும், ஒளிமயமான எதிர்காலத்தைக் கண்டடைய  வேண்டுமென்று, இறைவா உம்மை மன்றாடுகிறோம்.

4. “கிறிஸ்து மீது நம்பிக்கை கொண்ட நிலையில் இறந்தவர்கள் உயிர்த்தெழுவர்” என்று  பவுலடியாரின் மடல் கூறுவதுபோல எங்கள் குடும்பங்களிலும், அன்பியங்களிலும், பங்கிலும் மரித்த அனைத்து ஆன்மாக்களும் இறைவனின் முடிவில்லா ஒளியில் இன்புற்றிருக்க வேண்டுமென்று, இறைவா உம்மை மன்றாடுகிறோம்.

5. விளக்குகள் இருந்தால் மட்டும் போதாது, எண்ணெய்யும் இருந்தால் தான் உண்மையான தயார் நிலையில் இருக்க முடியும் என்றுணர்த்தும் நற்செய்தியை கேட்ட நாங்கள் அனைவரும், எங்களிடம் திறமைகள் இருந்தாலும், ஆசைகள் இருந்தாலும், நல்லெண்ணம் இருந்தாலும், உழைப்பும் மனத்திட்பமும் உறுதியான நம்பிக்கையும் இல்லையென்றால் மகிழ்ச்சி காண முடியாது என்பதை உணர்ந்து, எப்போதும் விழிப்பாய் இருந்து, சோர்ந்து போகாது, வெற்றி நோக்கிப் பயணிக்க அருள்தர வேண்டுமென்று, இறைவா உம்மை மன்றாடுகிறோம்.


Monday, October 26, 2026

பொதுக்காலம் ஆண்டின் 31ஆம் ஞாயிறு 1.11.2026

 பொதுக்காலம் ஆண்டின் 31ஆம் ஞாயிறு 1.11.2026

அனைத்துப் புனிதர்கள் பெருவிழா


திருப்பலி முன்னுரை

பாசத்திற்குரிய இறைமக்களே! இன்று நாம் விண்ணகத்தில் கடவுளின் திருமுன் மகிழ்ந்து கொண்டிருக்கும் அனைத்துப் புனிதர்களின் பெருவிழாவை எழுச்சியுடன் கொண்டாடுகிறோம்.

திருச்சபையினால் அதிகாரப்பூர்வமாகப் புனிதர்கள் என அறிவிக்கப்பட்டவர்கள் மட்டுமல்லாது, மண்ணுலகில் இறைவனின் திருவுளத்தை நிறைவேற்றி, இன்று விண்ணகப் பேரின்பத்தில் இணைந்திருக்கும் எண்ணற்ற புனிதர்களை இன்று நாம் நினைவு கூர்கிறோம். அவர்கள் நமக்காகப் பரிந்து பேசுவதுடன், நாமும் புனித வாழ்வு வாழ முடியும் என்ற நம்பிக்கையைத் தருகிறார்கள்.

இன்றைய நற்செய்தியில், இயேசு வழங்கிய 'மலைப்பொழிவு' அல்லது 'பேறுபெற்ற நிலைகள்' புனித வாழ்விற்கான வரைபடமாகும். ஏழ்மை, இரக்கம், தூய்மை, அமைதி மற்றும் நீதிக்காகத் துன்புறுத்தப்படுதல் ஆகியவையே விண்ணகத்திற்குச் செல்லும் வழிகள் என்பதைப் புனிதர்கள் நமக்குக் காட்டியுள்ளனர். நாமும் கடவுளின் பிள்ளைகள் என்ற உரிமையோடு புனிதத்தை நோக்கிப் பயணம் செய்ய வரம் வேண்டி, இத்திருப்பலியில் பக்தியுடன் பங்கேற்போம்.

முதல் வாசக முன்னுரை:

விண்ணகத்தில் அரியணையின் முன்பும், ஆட்டுக்குட்டியாம் இயேசுவின் முன்பும் நின்றுகொண்டிருக்கும் எண்ணற்ற புனிதர்களைப் பற்றிய காட்சியைத் திருத்தூதர் யோவான் விவரிக்கிறார். அவர்கள் பெரும் துன்பங்களிலிருந்து கடந்து வந்தவர்கள் என்றும், ஆட்டுக்குட்டியின் இரத்தத்தால் தங்கள் ஆடைகளை வெண்மையாக்கியவர்கள் என்றும் விவரிக்கும் இவ்வாசகத்தைக் கேட்போம்.

பதிலுரைப் பாடல்

திபா 24: 1-2. 3-4ab. 5-6 .

பல்லவி: ஆண்டவரை நாடுவோரின் தலைமுறையினர் இவர்களே.

1. மண்ணுலகும் அதில் நிறைந்துள்ள அனைத்தும் ஆண்டவருடையவை; நிலவுலகும் அதில் வாழ்வனவும் அவருக்கே சொந்தம். ஏனெனில், அவரே கடல்களின்மீது அதற்கு அடித்தளமிட்டார்; ஆறுகள்மீது அதை நிலைநாட்டினவரும் அவரே. - பல்லவி

2. ஆண்டவரது மலையில் ஏறத் தகுதியுள்ளவர் யார்? அவரது திருத்தலத்தில் நிற்கக்கூடியவர் யார்? கறைபடாத கைகளும் மாசற்ற மனமும் உடையவர்; பொய்த் தெய்வங்களை நோக்கித் தம் உள்ளத்தை உயர்த்தாதவர். - பல்லவி

3.இவரே ஆண்டவரிடம் ஆசி பெறுவார்; தம் மீட்பராம் கடவுளிடமிருந்து நேர்மையாளர் எனத் தீர்ப்புப் பெறுவார். அவரை நாடுவோரின் தலைமுறையினர் இவர்களே; யாக்கோபின் கடவுளது முகத்தைத் தேடுவோர் இவர்களே. - பல்லவி

இரண்டாம் வாசக முன்னுரை:

நாம் கடவுளின் பிள்ளைகள் என்று அழைக்கப்படுவது எவ்வளவு பெரிய அன்பு என்பதைப் புனித யோவான் வியப்புடன் கூறுகிறார். நாம் இப்போது கடவுளின் பிள்ளைகளாய் இருக்கிறோம்; கிறிஸ்து வெளிப்படும்போது நாமும் அவரைப் போலவே இருப்போம் என்ற நம்பிக்கையோடு, நம்மைத் தூய்மைப்படுத்திக் கொள்ள அழைப்பு விடுக்கப்படும் இவ்வாசகத்திற்குச் செவிசாய்ப்போம்.

நற்செய்திக்கு முன் வாழ்த்தொலி

மத் 11: 28

அல்லேலூயா, அல்லேலூயா! பெருஞ்சுமை சுமந்து சோர்ந்திருப்பவர்களே, எல்லாரும் என்னிடம் வாருங்கள். நான் உங்களுக்கு இளைப்பாறுதல் தருவேன், என்கிறார் ஆண்டவர். அல்லேலூயா.

நம்பிக்கையாளரின் மன்றாட்டுகள்

1. புனிதர் அனைவரின் திருவிழாவினைக் கொண்டாடுகிற இந்நாளில், திருஅவையை வழிநடத்தும் எங்கள் திருத்தந்தை லியோ, ஆயர்கள், அருள் பணியாளர்கள், துறவியர், இறைமக்கள் ஆகிய எங்கள் அனைவருக்காகவும் மன்றாடுகிறோம். புனிதத்தின் பாதையில் நாங்கள் எந்நாளும் பயணித்து, வாகை சூடியவர்களாய் வானக வீட்டை அடையும் பேற்றினை பெற வேண்டுமென்று, இறைவா உம்மை மன்றாடுகிறோம்.

2. எல்லா நாட்டையும், குலத்தையும் மக்களினத்தையும் மொழியையும் சார்ந்தவர்களுக்கும் விண்ணக பேரின்பத்தில் பங்கு தரத் திருவுளம் கொண்ட இறைவா, இவ்வுலகில் அமைதி நிலவ வேண்டுமென்றும், தலைவர்களும் குடிமக்களாகிய நாங்களும், நீதியின் பாதையில் பயணித்து ஒன்றுபட்ட உலகை உருவாக்க       வேண்டுமென்று, இறைவா உம்மை மன்றாடுகிறோம்.

3. இறந்த அடியார்களை நினைவு கூர்ந்து ஜெபிக்கிற இம்மாதத்தில், எங்கள் குடும்பங்களிலும், அன்பியங்களிலும், பங்குகளிலும் மரித்த ஆன்மாக்கள் அனைவருக்காகவும் மன்றாடுகிறோம். அவர்கள் அனைவருக்கும் நித்திய இளைப்பாற்றியையும், முடிவில்லா பேரின்பத்தையும் தந்தருள வேண்டுமென்று, இறைவா உம்மை மன்றாடுகிறோம்.

4. “அவர் தோன்றும்போது நாமும் அவரைப் போல் இருப்போம்” என்பதை எடுத்தியம்பும் யோவானின் திருமடலின் கூற்றை உணர்ந்தவர்களாக, நாங்களும், எங்கள் குடும்பமும், இளையோரும், குழந்தைகளும், இவ்வுலகில் வாழ்கிறபோதே உம்மைப்போலவே இருக்கவும், நீர் தூயவராய் இருப்பது போல் நாங்களும் தூயவராக வாழவும் வரமருள வேண்டுமென்று, இறைவா உம்மை மன்றாடுகிறோம்.

5. இங்கே கூடியுள்ள நாங்கள் அனைவரும், ஏழையரின் உள்ளத்தோராகவும், கனிவுடையோராகவும், நீதி நிலைநாட்டும் வேட்கை கொண்டோராகவும், இரக்கமுடையோராகவும், தூய்மையான உள்ளத்தோராகவும், அமைதி ஏற்படுத்துவோராகவும் துலங்கி, இவ்வுலகிலும், மறுவுலகிலும்   பேறுபெற்றோராய் விளங்க வேண்டுமென்று, இறைவா உம்மை மன்றாடுகிறோம்.

https://anbinmadal.org

Print Friendly and PDF

Thursday, October 22, 2026

பொதுக்காலம் ஆண்டின் 30ஆம் ஞாயிறு 25.10.2026

பொதுக்காலம் ஆண்டின் 30ஆம் ஞாயிறு 25.10.2026


இன்றைய நற்செய்தி வாசகங்கள்

விடுதலைப் பயண நூல் 22: 21-27
1 தெசலோனிக்கர் 1:  5–10
மத்தேயு 22: 34-40

திருப்பலி முன்னுரை

பாசத்திற்குரிய இறைமக்களே! இன்று நாம் பொதுக்காலத்தின் 30-ஆம் ஞாயிறு வழிபாட்டைக் கொண்டாடுகிறோம்.

"திருச்சட்ட நூலில் மிக முக்கியமான கட்டளை எது?" என்ற பரிசேயரின் கேள்விக்கு இயேசு இன்று பதிலளிக்கிறார். இறைவனை முழு இதயத்தோடும், முழு ஆன்மாவோடும் அன்பு செய்வதும், நமக்கு அடுத்திருப்பவரை நம்மைப் போலவே அன்பு செய்வதுமே அந்த இரு பெரும் கட்டளைகள். இந்த இரண்டு கட்டளைகளுக்குள் தான் ஒட்டுமொத்தத் திருச்சட்டமும் இறைவாக்குகளும் அடங்கியுள்ளன.

முதல் வாசகத்தில், அன்னியர்கள், விதவைகள், ஏதிகள் மற்றும் ஏழைகளிடம் அன்பு காட்டாதபோது, அவர்களின் அழுகுரலைக் கேட்டு ஆண்டவர் சினம் கொள்வார் என எச்சரிக்கப்படுகிறோம். இரண்டாம் வாசகத்தில், தெசலோனிக்க விசுவாசிகள் எவ்வாறு சிலைகளை விட்டு விலகி, உயிருள்ள கடவுளுக்கு அன்பு செலுத்திப் பிறருக்கு முன்மாதிரியாகத் திகழ்ந்தார்கள் என்பதைப் புனித பவுல் விளக்குகிறார். நாம் ஆண்டவரிடம் காட்டும் அன்பு, பிறருக்குச் செய்யும் சேவையில் வெளிப்பட வேண்டும். அந்த அன்பின் பாதையில் நடக்க வரம் வேண்டி, இத்திருப்பலியில் பக்தியுடன் பங்கேற்போம்

முதல் வாசக முன்னுரை

ஆண்டவர் எளியோர் மற்றும் நலிந்த பிரிவினர் மீது கொண்டுள்ள அக்கறையை இவ்வாசகம் வெளிப்படுத்துகிறது. அன்னியரைத் துன்புறுத்தக் கூடாது, விதவைகளையும் அனாதைகளையும் ஒடுக்கக் கூடாது, ஏழைகளிடம் வட்டி வாங்கக் கூடாது போன்ற சமூகக் கடமைகளை ஆண்டவர் வலியுறுத்துகிறார். எளியோரின் அழுகுரலுக்கு இறைவன் செவிசாய்ப்பார் என்பதை விளக்கும் இவ்வாசகத்தைக் கேட்போம்.

பதிலுரைப்பாடல்

பல்லவி: எனது ஆற்றலாகிய ஆண்டவரே! உம்மிடம் நான் அன்பு கூர்கின்றேன்

பதிலுரைப்பாடல். திபா. 18: 1-2,2-3,46.50

என் ஆற்றலாகிய ஆண்டவரே! உம்மிடம் நான் அன்புகூர்கின்றேன். ஆண்டவர் என் கற்பாறை: என் கோட்டை: என் மீட்பர். பல்லவி

என் இறைவன்: நான் புகலிடம் தேடும் மலை அவரே: என் கேடயம், எனக்கு மீட்பளிக்கும் வல்லமை, என் அரண். போற்றற்குரிய ஆண்டவரை நோக்கி நான் மன்றாடினேன. என் எதிரிகளிடமிருந்து நான் மீட்கப் பட்டேன். பல்லவி

ஆண்டவர் உண்மையாகவே வாழ்கின்றார்! என் கற்பாறையாம் அவர் போற்றப் பெறுவராக! என் மீட்பராம் கடவுள் மாட்சியுறுவராக! தாம் ஏற் படுத்திய அரசருக்கு மாபெரும் வெற்றியை அளிப்பவர் அவர், தாம் திருப் பொழிவு செய்த தாவீதுக்கும் அவர்தம் மரபினருக்கும் என்றென்றும் பேரன்பு காட்டுபவரும் அவரே. பல்லவி

இரண்டாம் வாசக முன்னுரை

தெசலோனிக்க திருச்சபையினர் துன்பங்களுக்கு மத்தியிலும் தூய ஆவி தந்த மகிழ்ச்சியோடு இறைவார்த்தையை ஏற்றுக்கொண்டனர். அவர்கள் சிலைகளை விடுத்து உயிருள்ள கடவுளைத் தேடியது, மாசிதோனியா மற்றும் அக்காயாவில் உள்ள விசுவாசிகள் அனைவருக்கும் ஒரு முன்மாதிரியாக அமைந்தது என்று பாராட்டும் இவ்வாசகத்திற்குச் செவிசாய்ப்போம்.
நற்செய்திக்கு முன் வாழ்த்தொலி
அல்லேலூயா, அல்லேலூயா! “என்மீது அன்பு கொண்டுள்ளவர் நான் சொல்வதைக் கடைப்பிடிப்பார். என் தந்தையும் அவர்மீது அன்பு கொள்வார். நாங்கள் அவரிடம் வந்து அவருடன் குடிகொள்வோம்”  என்கிறார் ஆண்டவர். அல்லேலூயா.
நம்பிக்கையாளரின் மன்றாட்டுகள்
1. நல்லாயனாம் இறைவா, திருஅவையை வழிநடத்தும் எங்கள் திருத்தந்தை லியோ, ஆயர்கள், அருள் பணியாளர்கள் மற்றும் துறவியர் அனைவரும், எங்களை நல்வழியில் நடத்தவும், இறைமக்கள் ஆகிய நாங்கள் அனைவரும், இறையன்பு, பிறரன்பு ஆகிய  முதன்மையான கட்டளைகளை பின்பற்றும் நன்மக்களாக விளங்கவும் வரமருள வேண்டுமென்று, இறைவா உம்மை மன்றாடுகிறோம்.

2. அமைதியின் அரசரே இறைவா, பிளவுபட்ட உலகிற்கு ஒற்றுமையையும், போர்புரியும் நாடுகளுக்கு இடையே அமைதியையும், எம் தாய்த் திருநாட்டுக்கும், தமிழகத்துக்கும் நிறைவாழ்வையும் அருள வேண்டுமென்றும், தலைவர்களும், மக்களும் பொறுப்புடன் தங்கள் பணியை ஆற்றிட அருள்தர வேண்டுமென்றும், இறைவா உம்மை மன்றாடுகிறோம்.

3. இரக்கத்தின் ஆண்டவரே இறைவா, அன்னியருக்கும், அனாதைகளுக்கும், வறியவருக்கும் நாங்கள் காட்ட வேண்டிய கருணையை, இன்றைய முதல் வாசகம் மூலம் கற்றுக்கொண்ட நாங்கள், இரக்கத்தின் மக்களாக விளங்கி, ஈகையிலும் பகிர்தலிலும் சிறந்தோங்க வேண்டுமென்று, இறைவா உம்மை மன்றாடுகிறோம்.

4. எங்கள் கோட்டையும் கற்பாறையுமான இறைவா, இடர்கள், இடுக்கண், இன்னல்கள் ஆகியவற்றால்  மனம் சோர்ந்துபோகிற மக்கள் அனைவரும், இன்றைய தியானத் திருப்பாடல் வரிகளை தமதாக்கி, உம்மை அன்பு செய்து, உம்மையே ஆற்றலாகவும் அடைக்கலமாகவும் கொண்டு, மீட்பளிக்கும் வல்லமையை உம்மிடமிருந்து பெற்று மகிழ வேண்டுமென்று, இறைவா உம்மை மன்றாடுகிறோம்.

5. நிறைவாழ்வின் ஊற்றாகிய இறைவா, இங்கே கூடியுள்ள நாங்கள் அனைவரும், எங்கள் முழு இதயத்தோடும், முழு உள்ளத்தோடும், முழு மனத்தோடும் ஆண்டவராகிய கடவுளிடம் அன்பு செலுத்தவும், எம்மீது அன்பு கூர்வதுபோல எமக்கு அடுத்திருப்பவர்மீதும் அன்புகூர்ந்து, திருச்சட்டம், இறைவாக்கு ஆகியவற்றின் அடித்தளத்தின் மீது எங்கள் வாழ்வை கட்டியெழுப்பவும் வேண்டுமென்று, இறைவா உம்மை மன்றாடுகிறோம்.


https://anbinmadal.org

Print Friendly and PDF

Sunday, October 11, 2026

பொதுக்காலம் ஆண்டின் 29ஆம் ஞாயிறு 18.10.2026

பொதுக்காலம் ஆண்டின் 29ஆம் ஞாயிறு 18.10.20263

அகில உலக மறைபரப்புப் பணி (நற்செய்தி அறிவிப்புப் பணி) ஞாயிறு



இன்றைய நற்செய்தி வாசகங்கள்

 எசாயா 45:1,4-6
தெசலோனிக்கர் 1: 1-5அ
மத்தேயு 22:15-21

திருப்பலி முன்னுரை

பாசத்திற்குரிய இறைமக்களே! இன்று நாம் பொதுக்காலத்தின் 29-ஆம் ஞாயிறு வழிபாட்டைக் கொண்டாடுகிறோம்.

இன்றைய நற்செய்தியில் இயேசுவின் ஞானம் மிகுந்த ஒரு பதிலைக் கேட்கிறோம். "சீசருக்கு உரியவற்றைச் சீசருக்கும், கடவுளுக்கு உரியவற்றைக் கடவுளுக்கும் கொடுங்கள்" என்ற வார்த்தை வழியாக, குடிமக்களாக நமது கடமையையும், விசுவாசிகளாக இறைவனுக்குச் செய்ய வேண்டிய கடமையையும் இயேசு சமப்படுத்துகிறார். ஒரு நாணயத்தில் ஆட்சியாளரின் உருவம் இருப்பது போல, மனிதர்களாகிய நமக்குள் இறைவனின் உருவம் பொறிக்கப்பட்டுள்ளது. எனவே நாம் முழுமையாக இறைவனுக்கே சொந்தமானவர்கள்.

முதல் வாசகத்தில், பிற இனத்து மன்னரான சைரசைக் கடவுள் தமது கருவியாகப் பயன்படுத்துவதை வாசிக்கிறோம். இரண்டாம் வாசகத்தில், தெசலோனிக்க விசுவாசிகளின் விசுவாசத்தையும் உழைப்பையும் புனித பவுல் பாராட்டுகிறார். இன்று உலக மறைப்பணி ஞாயிறு கொண்டாடப்படும் வேளையில், நற்செய்தி அறிவிக்கும் பணி நம் ஒவ்வொருவருக்கும் உரியது என்பதை உணர்வோம். நாம் இறைவனுக்குப் படைக்க வேண்டிய நற்செயல் என்னும் காணிக்கையை அவருக்குத் தர வரம் வேண்டி, இத்திருப்பலியில் பக்தியுடன் பங்கேற்போம்.

முதல் வாசக முன்னுரை 

ஆண்டவர் தம் மக்களாகிய இஸ்ரயேலரை மீட்க, பாரசீக மன்னர் சைரசைத் தேர்ந்தெடுக்கிறார். சைரசு இறைவனை அறியாதவராக இருந்தாலும், கடவுள் அவரைத் தமது கருவியாகப் பயன்படுத்துகிறார். "நானே ஆண்டவர்; என்னைத் தவிர வேறு எவரும் இல்லை" என்று உலகெங்கும் பறைசாற்றப்படும் இவ்வாசகத்தைக் கேட்போம்.

பதிலுரைப்பாடல்

பல்லவி: மாட்சியையும் ஆற்றலையும் ஆண்டவருக்குச் சாற்றுங்கள்.
பதிலுரைப்பாடல். திபா. 96: 1, 3-5, 7-10

ஆண்டவருக்குப் புதியதொரு பாடல் பாடுங்கள். உலகெங்கும் வாழ்வோரே, ஆண்டவரைப் போற்றிப் பாடுங்கள். பிற இனத்தார்க்கு அவரது மாட்சியை எடுத்துரையுங்கள். அனைத்து மக்களினங்களுக்கும் அவர்தம் வியத்தகு செயல்களை அறிவியுங்கள். பல்லவி

ஏனெனில், ஆண்டவர் மாட்சி மிக்கவர். பெரிதும் போற்றத் தக்கவர். தெய்வங்கள் அனைத்திற்கும் மேலாக அஞ்சுதற்கு உரியவர் அவரே. மக்களினங்களின் தெய்வங்கள் அனைத்தும் வெறும் சிலைகளே. ஆண்டவரோ விண்ணுலகைப் படைத்தவர். பல்லவி

மக்களினங்களின் குடும்பங்களே, ஆண்டவருக்குச் சாற்றுங்கள். மாட்சியையும் ஆற்றலையும் ஆண்டவருக்குச் சாற்றுங்கள். ஆண்டவரின் பெயருக்குரிய மாட்சியை அவருக்குச் சாற்றுங்கள். உணவுப்படையல் ஏந்தி அவர்தம் கோவில் முற்றங்களுக்குள் செல்லுங்கள். பல்லவி

தூய கோலத்துடன் ஆண்டவரை வழிபடுங்கள். உலகெங்கும் வாழ்வோரே, அவர் திருமுன் நடுங்குங்கள். வேற்றினத்தாரிடையே கூறுங்கள். ஆண்டவரே ஆட்சி செய்கின்றார். அவர் மக்களினங்களை நீதி வழுவாது தீர்ப்பிடுவார். பல்லவி

இரண்டாம் வாசக முன்னுரை 

புனித பவுல் அடியார் தெசலோனிக்க திருச்சபையினருக்காக இறைவனுக்கு நன்றி செலுத்துகிறார். அவர்களின் விசுவாசத்தினால் விளைந்த செயல், அன்பினால் மிகுந்த உழைப்பு மற்றும் எதிர்பார்ப்பினால் வந்த உறுதி ஆகியவற்றை அவர் பாராட்டும் இவ்வாசகத்திற்குச் செவிசாய்ப்போம்.

 நற்செய்திக்கு முன் வாழ்த்தொலி

அல்லேலூயா, அல்லேலூயா! வாழ்வின் வார்த்தையைப் பற்றிக் கொள்ளுங்கள். உலகில் ஒளிரும் சுடர்களாகத் துலங்குவீர்கள்  அல்லேலூயா.

நம்பிக்கையாளரின் மன்றாட்டு

1. ஆண்டவரால் திருப்பொழிவு செய்ய்யப்பட்டு, தேர்ந்து கொள்ளப்பட்டவர்களாக விளங்குகிற எங்கள் திருத்தந்தை லியோ, ஆயர்கள், அருள் பணியாளர்கள் மற்றும் துறவியர் அனைவரும் தங்களது மேய்ப்புப்பணியை சிறப்பாகச் செய்திடவும், ஒரே மந்தையின் மக்களாகிய இறைமக்கள் ஆகிய நாங்கள் அனைவரும், ஆயனின் பின்செல்லுகிற நல்ல ஆடுகளாய் விளங்கிடவும் அருள்தர வேண்டுமென்றும், இறைவா உம்மை மன்றாடுகிறோம்.

2. கதிரவன் உதிக்கும் திசை தொடங்கி மறையும் திசைவரை நீரே மாட்சிமிக்கவர்; பெரிதும் போற்றத் தக்கவர்; அனைத்திற்கும் மேலாக அஞ்சுதற்கு உரியவர் என அறிக்கையிடும் நாங்கள் உலக அமைதிக்காகவும், நாட்டு நலனுக்காகவும், எம்மாநிலத்தின் வளர்ச்சிக்காகவும் மன்றாடுகிறோம். தலைவர்களும், குடிமக்களாகிய நாங்களும் பொறுப்புடன் செயல்பட்டு வளர்ச்சி காண வேண்டுமென்று, இறைவா உம்மை மன்றாடுகிறோம்.

3. தூய பவுலடியாரால் போற்றப்பட்ட தெசலோனிக்கரிடமிருந்த செயலில் வெளிப்பட்ட நம்பிக்கை, அன்பினால் உந்தப்பட்ட உழைப்பு, ஆண்டவர் இயேசு கிறிஸ்துவை எதிர்நோக்கி இருப்பதால் பெறுகிற மனவுறுதி ஆகியவற்றின் மூலம் இறைவனின் உயிருள்ள சாட்சிகளாகக் கிறிஸ்தவர்கள் யாவரும் திகழ வேண்டுமென்று, இறைவா உம்மை மன்றாடுகிறோம்.

4. சீசருக்கு உரியவற்றைச் சீசருக்கும் கடவுளுக்கு உரியவற்றைக் கடவுளுக்கும் கொடுக்க வேண்டியதின் அவசியத்தை நற்செய்தியின் மூலம் அறிந்தவர்களாகிய  நாங்கள் அனைவரும், எங்கள் குழந்தைகளையும், இளையோரையும், நாட்டுக்கேற்ற நல்ல மனிதர்களாகவும், இறைவனுக்குகந்த நல்ல பிள்ளைகளாகவும் வளர்த்தெடுக்கும் அருள்பெற வேண்டுமென்று, இறைவா உம்மை மன்றாடுகிறோம்.

5. இங்கே கூடியுள்ள நாங்கள் அனைவரும், அனைத்து நலன்களும் பெற்றிடவும், உடல் உள்ள ஆன்மீக நலத்துடன் வாழவும், வாழ்வின் எல்லாச் சூழலையும் எதிர்கொள்வதற்குத் தேவையான துணிவு பெறவும், குடும்பங்கள் அனைத்தும் அமைதியில் மகிழ வேண்டுமென்றும் இறைவா உம்மை மன்றாடுகிறோம்.


https://anbinmadal.org

Print Friendly and PDF

Thursday, October 8, 2026

பொதுக்காலம் ஆண்டின் 28ஆம் ஞாயிறு 11.10.2026

பொதுக்காலம் ஆண்டின் 28ஆம் ஞாயிறு 11.10.2026

இன்றைய நற்செய்தி வாசகங்கள்

எசாயா 25: 6-10
பிலிப்பியர் 4: 12-14, 19-20
மத்தேயு 22: 1-14

திருப்பலி முன்னுரை

பாசத்திற்குரிய இறைமக்களே! இன்று நாம் பொதுக்காலத்தின் 28-ஆம் ஞாயிறு வழிபாட்டைக் கொண்டாடுகிறோம்.

இன்றைய நற்செய்தியில் "அரச திருமண விருந்து" உவமையின் வழியாக இறைவன் நமக்குத் தரும் மீட்பின் அழைப்பை இயேசு விளக்குகிறார். இறைவன் எல்லா மக்களுக்கும் ஒரு பெரும் விருந்தை ஆயத்தம் செய்துள்ளார். ஆனால், அழைப்புப் பெற்றவர்களோ உலகக் காரியங்களைக் காரணம்காட்டி வர மறுக்கிறார்கள். இதனால் அந்த அழைப்பு தகுதியற்றவர்களுக்கும், பாவிகளுக்கும் வழங்கப்படுகிறது.

முதல் வாசகத்தில் ஏசாயா இறைவாக்கினர், ஆண்டவர் சாவையே அழித்து எல்லா மக்களின் கண்ணீரையும் துடைக்கும் ஒரு பெரும் விருந்தைப் பற்றி முன்னறிவிக்கிறார். இரண்டாம் வாசகத்தில், எத்தகைய சூழலிலும் மனநிறைவோடு வாழும் ஆற்றலை இறைவன் தருகிறார் எனப் புனித பவுல் கூறுகிறார். இறைவனின் அழைப்பை ஏற்று அவரது விருந்துச் சாலைக்குள் நுழைய நாம் 'திருமண ஆடை' என்னும் புனிதமான வாழ்வை அணிந்திருக்கிறோமா? எனச் சிந்திக்க அழைக்கப்படுகிறோம். இந்தத் திருப்பலி என்னும் விண்ணக விருந்தில் தகுதியுடன் பங்கேற்க வரம் வேண்டி, இறைவனிடம் மன்றாடுவோம்.

முதல் வாசக முன்னுரை 

ஆண்டவர் சீயோன் மலையில் எல்லா மக்களினத்தாருக்கும் ஒரு பெரும் விருந்தை அளிப்பார். அவர் மக்களின் முகங்களிலிருந்து கண்ணீரைத் துடைத்து, சாவையே என்றென்றைக்கும் அழித்துவிடுவார். நாம் எதிர்பார்த்துக் காத்திருக்கும் கடவுள் எமக்கு மீட்பு அளிப்பார் என்ற நம்பிக்கையைத் தரும் இவ்வாசகத்தைக் கேட்போம்.

பதிலுரைப்பாடல்

திபா 23: 1-3. 3b-4. 5. 6

பல்லவி: நான் ஆண்டவரின் இல்லத்தில் நெடுநாள் வாழ்ந்திருப்பேன்.

1 ஆண்டவரே என் ஆயர்; எனக்கேதும் குறையில்லை.  பசும் புல்வெளிமீது எனை அவர் இளைப்பாறச் செய்வார்; அமைதியான நீர்நிலைகளுக்கு எனை அழைத்துச் செல்வார்.அவர் எனக்குப் புத்துயிர் அளிப்பார். -பல்லவி

2. தம் பெயர்க்கேற்ப எனை நீதிவழி நடத்திடுவார்;  மேலும், சாவின் இருள்சூழ் பள்ளத்தாக்கில் நான் நடக்க நேர்ந்தாலும், நீர் என்னோடு இருப்பதால் எத்தீங்கிற்கும் அஞ்சிடேன்; உம் கோலும் நெடுங்கழியும் என்னைத் தேற்றும். -பல்லவி

3 என்னுடைய எதிரிகளின் கண் முன்னே எனக்கொரு விருந்தினை ஏற்பாடு செய்கின்றீர்; என் தலையில் நறுமணத் தைலம் பூசுகின்றீர்; எனது பாத்திரம் நிரம்பி வழிகின்றது. -பல்லவி

4 உண்மையாகவே, என் வாழ்நாள் எல்லாம் உம் அருள் நலமும் பேரன்பும் என்னைப் புடைசூழ்ந்து வரும்; நானும் ஆண்டவரின் இல்லத்தில் நெடுநாள் வாழ்ந்திருப்பேன். -பல்லவி

இரண்டாம் வாசக முன்னுரை 

வறுமையிலும் வாழ்விலும், நிறைவிலும் குறையிலும் எவ்வாறு மனநிறைவோடு இருக்க வேண்டும் என்பதைப் புனித பவுல் அடியார் விளக்குகிறார். "எனக்கு வலுவூட்டுகிறவரின் துணையால் எதையும் செய்ய எனக்கு ஆற்றல் உண்டு" என்ற உறுதியோடு அவர் பேசும் இவ்வாசகத்திற்குச் செவிசாய்ப்போம்.

நற்செய்திக்கு முன் வாழ்த்தொலி

அல்லேலூயா, அல்லேலூயா! கடவுளுடைய அழைப்பு உங்களுக்கு எத்தகைய எதிர்நோக்கைத் தந்துள்ளது என்று நீங்கள் அறியுமாறு உங்கள் அகக்கண்கள் ஒளியூட்டப் பெறுவனவாக! . அல்லேலூயா.

நம்பிக்கையாளரின் மன்றாட்டு

1. அழைப்புப் பெற்ற பலரிலிருந்து தெரிந்தெடுக்கப்பட்ட சிலராகிய எங்கள் திருத்தந்தை லியோ, ஆயர்கள், அருள் பணியாளர்கள் மற்றும் துறவியர் அனைவரும் தங்கள் அழைத்தலின் மேன்மையை உணர்ந்து அதற்கேற்ப வாழ வேண்டுமென்றும், இறைமக்கள் ஆகிய நாங்களும் ஒருவிதத்தில் அழைக்கப்பட்டவர்களே என்றுணர்ந்து எங்கள் வாழ்க்கை நிலைக்கேற்ற தூய வாழ்வை மேற்கொள்ள வேண்டுமென்றும், இறைவா உம்மை மன்றாடுகிறோம்.

2. “இவரே நம் கடவுள்; இவர் நம்மை விடுவிப்பார்” என்கிற ஏசாயாவின் இறைவாக்கில்   நம்பிக்கை கொண்டு, உலகத்தார் அனைவரின் உண்மையான விடுதலைக்காக மன்றாடுகிறோம்    போர்களாலும், வன்செயல்களாலும் அமைதியை இழந்து தவிக்கும் உலகிற்கு, ஆண்டவர் தாமே அமைதியை அருளவும், எம் நாட்டினையும் மாநிலத்தையும் ஆட்சி புரிவோர், தீமையை ஒழித்து நனமையை நிலைநாட்ட அருள்தர வேண்டுமென்றும், இறைவா உம்மை மன்றாடுகிறோம்.

3. “மக்களினங்கள் அனைவருக்கும் சிறந்ததொரு விருந்தை ஏற்பாடு செய்வார்” என்கிற முதல் வாசக கூற்றின்படி, மாந்தர் அனைவருக்கும் உண்ண உணவு, உடுத்த உடை, இருக்க இடம் போன்ற இன்றியமையாத் தேவைகள் அனைத்தும் கிடைக்கப்பெறவும், எல்லாருக்கும் எல்லாம் கிடைக்கப்பதற்கு பாடுபடுகிறபோதிலும், தாங்களே இல்லாமையில் தவிக்கிற நிலையில் இருக்கும் விவாசயிகள், நெசவாளர்கள், தொழிலாளிகள் எல்லோரும் நிறைவுடன் வாழ வழிபிறக்க வேண்டுமென்றும், இறைவா உம்மை மன்றாடுகிறோம்.

4. பலதரப்பட்ட துன்பங்களாலும் துயரங்ககளாலும் அவதியுறும் மக்கள் அனைவருக்கும், “ஆண்டவர் எல்லா முகங்களிலிருந்தும் கண்ணீரைத் துடைத்து விடுவார்” என்கிற அருள்வாக்கும் “கடவுள், கிறிஸ்து இயேசுவின் வழியாய்த் தம் ஒப்பற்ற செல்வத்தைக் கொண்டு, உங்கள் தேவைகள் அனைத்தையும் நிறைவு செய்வார்” என்கிற இறைவாக்கும் உறுதி தந்து உற்சாகப்படுத்த வேண்டுமென்று, இறைவா உம்மை மன்றாடுகிறோம்.

5. இங்கே கூடியுள்ள நாங்கள் அனைவரும், தூய பவுலடியாரைப்போல, வறுமையிலும்  வளமையிலும், நிறைவோ குறைவோ எதிலும் எந்தச் சூழலிலும் வாழப் பயிற்சி பெற்றோராய் விளங்க வேண்டுமென்றும், அதே வேளையில் “எனக்கு வலுவூட்டுகிறவரின் துணை கொண்டு எதையும் செய்ய எனக்கு ஆற்றல் உண்டு” என்கிற நெஞ்சுரத்தோடு, வாழ்வின் சவால்களை எதிர்கொள்ளும் ஆற்றல் பெற்றோராய் விளங்க வேண்டுமென்றும், இறைவா உம்மை மன்றாடுகிறோம்.


www.anbinmadal.org


Print Friendly and PDF

Sunday, September 27, 2026

பொதுக்காலம் ஆண்டின் 27ஆம் ஞாயிறு 04.10.2026

 பொதுக்காலம் ஆண்டின் 27ஆம் ஞாயிறு 04.10.2026

The Prophetic Parable of the Vine-Growers

இன்றைய நற்செய்தி வாசகங்கள்

எசாயா 5: 1-7
பிலிப்பியர் 4: 6-9
மத்தேயு 21: 33-43

திருப்பலி முன்னுரை

பாசத்திற்குரிய இறைமக்களே! இன்று நாம் பொதுக்காலத்தின் 27-ஆம் ஞாயிறு வழிபாட்டைக் கொண்டாடுகிறோம்.
இன்றைய திருவழிபாடு "திராட்சைத் தோட்டம்" என்ற உருவகத்தின் வழியாக இறைவனுக்கும் நமக்கும் உள்ள உறவைச் சிந்தித்துப் பார்க்க அழைக்கிறது. முதல் வாசகத்தில், அன்புக்குரியவர் தன் திராட்சைத் தோட்டத்தைப் பண்படுத்திப் பாதுகாத்தப் பிறகும், அது கசப்பான கனிகளையே தந்தது என்று ஏசாயா இறைவாக்கினர் வருத்தத்தோடு கூறுகிறார். நற்செய்தியில், திராட்சைத் தோட்டத்தின் உரிமையாளர் அனுப்பிய பணியாளர்களையும், இறுதியில் அவரது மகனையும் குத்தகைக்காரர்கள் கொன்றுவிட்ட கொடுமையைக் காண்கிறோம்.
நாமும் இறைவனால் அன்புடனும் அக்கறையுடனும் வளர்க்கப்படும் திராட்சைத் தோட்டம். நம்மிடமிருந்து இறைவன் நீதியையும் நேர்மையையும் கனிகளாக எதிர்பார்க்கிறார். "எதைப் பற்றியும் கவலைப்படாமல் நன்றியுடன் செபியுங்கள்" என்று இரண்டாம் வாசகத்தில் புனித பவுல் அடியார் நமக்கு ஊக்கமளிக்கிறார். நாம் இறைவனுக்குக் கசப்பான கனிகளைத் தருகிறோமா அல்லது அவர் விரும்பும் நற்கனிகளைத் தருகிறோமா? என ஆராய்ந்து பார்த்து, உரிய காலத்தில் கனிகளைத் தரும் நல் நிலமாக மாற வரம் வேண்டி, இத்திருப்பலியில் பக்தியுடன் பங்கேற்போம்.

முதல் வாசக முன்னுரை

ஆண்டவர் இஸ்ரயேல் மக்களைத் தமக்குரிய திராட்சைத் தோட்டமாக அன்பு கூர்ந்து வளர்த்தார். அவர் அதனிடமிருந்து நீதியையும் நேர்மையையும் எதிர்பார்த்தார். ஆனால் அந்தத் தோட்டம் அநீதியையும் இரத்தக் கூச்சலையுமே கனிகளாகத் தந்தது. இறைவனின் அன்புக்குப் பதில் அன்பு செய்யத் தவறிய மக்களின் நிலையை விளக்கும் இவ்வாசகத்தைக் கேட்போம்.

பதிலுரைப்பாடல்

பல்லவி: ஆண்டவரது திராட்சைத் தோட்டம் இஸ்ரயேல் குடும்பத்தாரே.
பதிலுரைப்பாடல். திபா. 25:4-5, 6-7, 8-9
1. எகிப்தினின்று திராட்சைக்செடி ஒன்றைக் கொண்டுவந்தீர்; வேற்றினத்தாரை விரட்டிவிட்டு அதனை நட்டு வைத்தீர்அதன் கொடிகள் கடல்வரையும் அதன் தளிர்கள் பேராறுவரையும் பரவின.; பல்லவி
 

பின்னர், நீர் ஏன் அதன் மதில்களைத் தகர்த்துவிட்டீர்? அவ்வழிச்செல்வோர் அனைவரும் அதன் பழத்தைப் பறிக்கின்றனரே! காட்டுப் பன்றிகள் அதனை அழிக்கின்றன; வயல்வெளி உயிரினங்கள் அதனை மேய்கின்றன.பல்லவி

படைகளின் கடவுளே! மீண்டும் வாரும்! விண்ணுலகினின்று கண்ணோக்கிப் பாரும்; இந்தத் திராட்சைக் கொடிமீது பரிவு காட்டும்! உமது வலக்கை நட்டுவைத்த கிளையை, உமக்கென நீர் வளர்த்த மகவைக் காத்தருளும்! பல்லவி

இனி நாங்கள் உம்மைவிட்டு அகலமாட்டோம்; எமக்கு வாழ்வு அளித்தருளும்; நாங்கள் உமது பெயரைத் தொழுவோம். படைகளின் கடவுளான ஆண்டவரே! எங்களை முன்னைய நன்னிலைக்குக் கொணர்ந்தருளும்! நாங்கள் விடுதலை பெறுமாறு உமது முக ஒளியைக் காட்டியருளும்! பல்லவி

இரண்டாம் வாசக முன்னுரை

புனித பவுல் அடியார் பிலிப்பியர்களுக்கு வழங்கும் அறிவுரை, அமைதியான வாழ்விற்கான திறவுகோலாகும். எதைப் பற்றியும் கவலைப்படாமல் நன்றியோடு செபிக்குமாறும், தூய்மையானவை மற்றும் புகழுக்குரியவை எவையோ அவற்றையே சிந்தித்து வாழுமாறும் அழைப்பு விடுக்கும் இவ்வாசகத்திற்குச் செவிசாய்ப்போம்

நற்செய்திக்கு முன் வாழ்த்தொலி

அல்லேலூயா, அல்லேலூயா! நீங்கள் கனி தரவும், நீங்கள் தரும் கனி நிலைத்திருக்கவும் உங்களை ஏற்படுத்தினேன். . அல்லேலூயா.

நம்பிக்கையாளரின்  மன்றாட்டுகள் 

1. நாங்கள் கனி தரவும், நாங்கள் தருகிற கனி நிலைத்திருக்கவும் எங்களை ஏற்படுத்திய இறைவா, தாயாம் திருஅவையும், எங்களை வழிநடத்தும் திருத்தந்தை லியோ, ஆயர்கள், அருள் பணியாளர்கள் துறவியர், இறைமக்கள் ஆகிய நாங்கள் அனைவரும், நிறைந்த கனி தந்து உம்மை மகிழ்விக்க வேண்டுமென்று, இறைவா உம்மை மன்றாடுகிறோம்.

2. “அமைதியை அருளும் கடவுள் உங்களோடு இருப்பார்” என்கிற பவுலடியாரின் ஆசி இந்த அகிலத்திற்கு அமைதியையும் நல்வாழ்வையும் தரவேண்டுமென்றும், ஆட்சியாளர்களும் மக்களும் தங்கள் பொறுப்புகளை உணர்ந்து செயல்பட்டு, புனித பிரான்சிஸ் அசிசியார் வேண்டியது போல, அமைதியின் கருவிகளாய் விளங்க வேண்டுமென்று, இறைவா உம்மை மன்றாடுகிறோம்.

3. ஆண்டவரின் திராட்சை தோட்டமான இஸ்ராயேல் இறைவனுக்கு ஏமாற்றம் தந்தது போல் அல்லாமல், இறைமக்களாகிய நாங்கள், எங்கள் சிந்தனை, சொல், செயல் ஆகியவற்றால் இறைவனுக்கு ஏற்புடையவர்களாய் வாழவும், எங்கள் குழந்தைகளையும், இளையோரையும் நற்கனி தரும் மனிதர்களாக உருவாக்கவும் வேண்டுமென்று, இறைவா உம்மை மன்றாடுகிறோம்.

4. பல்வேறு சோதனைகளிலும், எண்ணற்ற இடர்களிலும் சிக்குண்டு தவிப்போர் அனைவரும், கவலைப்படுவதால் எந்தப் பயனும் இல்லை என்பதையுணர்ந்து, நன்றியோடு கூடிய இறைவேண்டல் மற்றும் நம்பிக்கை நிறைந்த மன்றாட்டு மூலமாகக் கடவுளிடம் விண்ணப்பங்களைத் தெரிவித்து, மன அமைதி மற்றும் உடல், உள்ள, ஆன்ம பாதுகாப்பு பெற்று வாழ வேண்டுமென்று, இறைவா உம்மை மன்றாடுகிறோம்
.
5. இங்கே கூடியுள்ள நாங்கள் அனைவரும், உண்மையானவை எவையோ, கண்ணியமானவை எவையோ, நேர்மையானவை எவையோ, தூய்மையானவை எவையோ, விரும்பத்தக்கவை எவையோ, பாராட்டுதற்கு உரியவை எவையோ, நற்பண்புடையவை எவையோ, போற்றுதற்குரியவை எவையோ, அவற்றையே மனத்தில் இருத்தி, மேன்மையான வாழ்வை மேற்கொள்ள வேண்டுமென்று, இறைவா உம்மை மன்றாடுகிறோம்.

https://anbinmadal.org

Print Friendly and PDF

Monday, September 21, 2026

பொதுக்காலம் ஆண்டின் 26ஆம் ஞாயிறு 27.09.2026

பொதுக்காலம் ஆண்டின் 26ஆம் ஞாயிறு 27.09.2026


இன்றைய நற்செய்தி வாசகங்கள்

எசேக்கியேல் 18: 25-28
பிலிப்பியர் 2 :1-11
மத்தேயு 21: 28-32

திருப்பலி முன்னுரை

ஆண்டவரின் அன்பிற்குரிய இறைமக்களே! இன்று நாம் பொதுக்காலத்தின் 26-ஆம் ஞாயிறு வழிபாட்டைக் கொண்டாடுகிறோம்.
இன்றைய திருவழிபாடு "மனமாற்றம்" மற்றும் "செயல்வடிவம் பெறும் விசுவாசம்" குறித்து நமக்கு அறிவுறுத்துகிறது. நற்செய்தியில் வரும் இரண்டு மகன்களின் உவமை, நாம் கடவுளுக்குக் கொடுக்கும் வாக்குறுதிகளைவிட, நமது செயல்களே முக்கியம் என்பதை உணர்த்துகிறது. "போகிறேன்" என்று சொல்லிவிட்டுப் போகாத மகனைப் போல நாம் வெறும் உதட்டளவிலான விசுவாசம் கொண்டிருக்கிறோமா? அல்லது முதலில் மறுத்தாலும் பின்னர் மனம் மாறித் தந்தையின் விருப்பத்தைச் செய்த மகனைப் போல இருக்கிறோமா? எனச் சிந்திக்க அழைக்கப்படுகிறோம்.
"ஆண்டவருடைய வழி நேர்மையற்றது" என்று முணுமுணுக்கும் மக்களுக்கு, இறைவனின் நீதி எத்தகையது என்பதை எசேக்கியேல் இறைவாக்கினர் முதல் வாசகத்தில் தெளிவுபடுத்துகிறார். "கிறிஸ்து இயேசு கொண்டிருந்த அதே மனநிலையை நீங்களும் கொண்டிருங்கள்" என்று புனித பவுல் இரண்டாம் வாசகத்தில் நமக்கு அறைகூவல் விடுக்கிறார். நமது தற்பெருமையைக் களைந்து, தாழ்மையோடும் கீழ்ப்படிதலோடும் இறைவனின் திராட்சைத் தோட்டத்தில் உழைக்க வரம் வேண்டி, இத்திருப்பலியில் பக்தியுடன் பங்கேற்போம்.

முதல் வாசக முன்னுரை 

இறைவனுடைய நீதி தவறானது என்று கருதிய இஸ்ரயேல் மக்களுக்கு ஆண்டவர் பதில் அளிக்கிறார். ஒரு நீதிமான் நீதியை விட்டு விலகிப் பாவம் செய்தால் அவர் சாவார்; ஆனால் ஒரு தீயவன் தன் தீய வழியை விட்டு மனம் மாறி நீதியுடன் நடந்தால் அவர் வாழ்வார். நமது கடந்த காலத் தவறுகளைவிட, இன்றைய மனமாற்றமே வாழ்வைத் தீர்மானிக்கிறது என்பதை விளக்கும் இவ்வாசகத்தைக் கேட்போம்.

இரண்டாம் வாசக முன்னுரை

புனித பவுல் அடியார் பிலிப்பியர்களுக்கு எழுதிய இக்கடிதம், கிறிஸ்துவின் தாழ்மையையும் கீழ்ப்படிதலையும் மிக அழகாக எடுத்துரைக்கிறது. கடவுள் வடிவில் இருந்த கிறிஸ்து, தம்மையே வெறுமையாக்கி அடிமையின் உருவை ஏற்றுச் சிலுவைச் சாவுவரை கீழ்ப்படிந்திருந்தார். நாமும் அதே ஒருமனப்பாட்டோடும் தாழ்மையோடும் வாழ அழைக்கும் இவ்வாசகத்திற்குச் செவிசாய்ப்போம்.

நற்செய்திக்கு முன் வாழ்த்தொலி

அல்லேலூயா, அல்லேலூயா! என் ஆடுகள் எனது குரலுக்குச் செவிசாய்க்கின்றன. எனக்கும் அவற்றைத் தெரியும். அவையும் என்னைப்பின் தொடர்கின்றன. அல்லேலூயா.

நம்பிக்கையாளரின் மன்றாட்டுகள் 

1. தாயாம் திருஅவையை வழிநடத்தும் திருத்தந்தை லியோ, ஆயர் பெருமக்கள், குருக்கள், துறவியர், இறைமக்கள் ஆகிய நாங்கள் அனைவரும், ஒரே எண்ணமும், ஒரே அன்பும், ஒரே உள்ளமும், கொண்டவராய்த் திகழ்ந்து, ஒரு மனத்தவராயிருந்து இறையரசுக்கு சான்றுபகர வேண்டுமென்று, இறைவா உம்மை மன்றாடுகிறோம்.
2. இந்த உலகிலும், எங்கள் நாட்டிலும் நிகழ்கிற வன்செயல்கள், அநீதிகள், போர்கள் இயற்கை சீற்றங்கள், பேரழிவுகள் ஆகியவற்றைக் கண்டு ‘கடவுளின் வழி செம்மையானதாக இல்லை’ என்று புலம்புகிற நாங்கள் ‘எங்கள் வழிகள் தான் நேர்மையற்றவை! என்று உணரவும், எமையாளும் தலைவர்களும், மக்களாகிய நாங்களும், நீதியையும் நேர்மையையும் கடைப்பிடிப்பதன் மூலம், அமைதி நிறை நல்வாழ்வை பெற்றிட வேண்டுமென்று, இறைவா உம்மை மன்றாடுகிறோம்.
3. எங்கள் பங்குகளிலும், அன்பியங்களிலும், நாங்கள்   கட்சி மனப்பான்மைக்கும், வீண் பெருமைக்கும் இடம் தராமல், மனத் தாழ்மையோடு மற்றவர்களை எங்களிலும் உயர்ந்தவராகக் கருதவும், நாங்கள் யாவரும் எங்களைச் சார்ந்தவற்றில் அல்ல, பிறரைச் சார்ந்தவற்றிலேயே அக்கறை கொண்டு, அன்புநிறை சமூகத்தையும், பண்பான குடும்பங்களையும் உருவாக்க வேண்டுமென்றும், இறைவா உம்மை மன்றாடுகிறோம்.
4. பொல்லாரும் வாழ வேண்டும், யாருமே அழிவுறக் கூடாது என்ற இறைவிருப்பதை உணர்ந்தவர்களாய், நாங்கள் அனைவரும், எங்கள் தீய வழிகளிலிருந்து விலகி, ஒருவர் ஒருவரை மன்னித்தும், தவறு செய்கிறபோது மன்னிப்புக் கேட்டும், இறைவனிடமும், மற்றவர்களிடமும் ஒப்புரவுடன் வாழ வேண்டுமென்று, இறைவா உம்மை மன்றாடுகிறோம்.
5. இங்கே கூடியுள்ள நாங்கள் அனைவரும், கிறிஸ்து இயேசு கொண்டிருந்த மனநிலையையே கொண்டிருக்கவும், இறைத்தந்தையின் விருப்பத்திற்கு தாழ்ச்சியுடன் பணிந்திருக்கவும், நற்செய்தி உவமையில் வருகிற இளைய மகன்போல வாய்ச்சொல் வீரராக அல்லாமல், மூத்த மகன்போலச் செயல் வீரராகத் திகழ்ந்து, எங்கள் கிறிஸ்தவ, சமூக, குடும்பக் கடமைகள் அனைத்தையும் முழுமனதோடு நிறைவேற்ற வேண்டுமென்று, இறைவா உம்மை மன்றாடுகிறோம். 

https://anbinmadal.org

Print Friendly and PDF

Monday, September 14, 2026

பொதுக்காலம் ஆண்டின் 25ஆம் ஞாயிறு 20.09.2026

பொதுக்காலம் ஆண்டின் 25ஆம் ஞாயிறு  20.09.2026

PARABLE OF THE WORKERS IN THE VINEYARD | A CHRISTIAN PILGRIMAGE

இன்றைய நற்செய்தி வாசகங்கள்:-

ஏசாயா 55: 6-9
பிலிப்பியர் 1: 20c-24, 27a
மத்தேயு 20: 1-16

திருப்பலி முன்னுரை:- 

ஆண்டவரின் அன்பிற்குரிய இறைமக்களே! இன்று நாம் பொதுக்காலத்தின் 25-ஆம் ஞாயிறு வழிபாட்டைக் கொண்டாடுகிறோம்.
இன்றைய நற்செய்தியில் "திராட்சைத் தோட்ட வேலையாட்கள்" உவமையின் வழியாக இறைவனின் கணக்கு மனிதக் கணக்கிலிருந்து முற்றிலும் மாறுபட்டது என்பதை இயேசு நமக்கு உணர்த்துகிறார். முதலில் வந்தவர்களுக்கும், இறுதியில் வந்தவர்களுக்கும் ஒரே கூலியைக் கொடுக்கும் தோட்ட உரிமையாளர், அநீதி இழைப்பவர் அல்ல; மாறாக அவர் தாராள குணமும் இரக்கமும் கொண்டவர்.
"என் எண்ணங்கள் உங்கள் எண்ணங்கள் அல்ல; உங்கள் வழிகள் என் வழிகள் அல்ல" என்று ஏசாயா இறைவாக்கினர் முதல் வாசகத்தில் கூறுகிறார். "வாழ்வது கிறிஸ்துவே" என்ற உயர் இலட்சியத்தைப் புனித பவுல் இரண்டாம் வாசகத்தில் நமக்கு முன்வைக்கிறார். நாம் எவ்வளவு காலம் உழைக்கிறோம் என்பதை விட, எவ்வளவு ஆர்வத்தோடும் நம்பிக்கையோடும் இறைவனோடு இணைந்து வாழ்கிறோம் என்பதே முக்கியம். பொறாமை மற்றும் குறுகிய மனப்பான்மையைக் களைந்துவிட்டு, இறைவனின் தாராளமான அருளைப் போற்றிப் புகழ வரம்கேட்டு, இத்திருப்பலியில் பக்தியுடன் பங்கேற்போம்.

வாசக முன்னுரைகள்:- 

முதல் வாசக முன்னுரை :-

ஆண்டவரைக் காணக்கூடிய காலத்தில் அவரைத் தேடுங்கள் என்று ஏசாயா இறைவாக்கினர் அழைக்கிறார். தீயவர்கள் தங்கள் வழியை விட்டுத் திரும்பி வந்தால், இறைவன் அவர்களுக்கு நிறைவாக மன்னிப்பு வழங்குவார். இறைவனின் எண்ணங்களும் வழிகளும் மனித அறிவுக்கு எட்டாத உயரத்தில் இருப்பதை விளக்கும் இவ்வாசகத்தைக் கேட்போம்.

பதிலுரைப்பாடல்:-

பல்லவி: தம்மை நோக்கி மன்றாடும் யாவருக்கும், ஆண்டவர் அண்மையில் இருக்கிறார்.
திபா 145: 2-3. 8-9. 17-18
நாள்தோறும் உம்மைப் போற்றுவேன்; உமது பெயரை என்றும் எப்பொழுதும் புகழ்வேன். ஆண்டவர் மாண்புமிக்கவர்; பெரிதும் போற்றுதலுக்கு உரியவர்; அவரது மாண்பு நம் அறிவுக்கு எட்டாதது. பல்லவி
ஆண்டவர் இரக்கமும் கனிவும் உடையவர்; எளிதில் சினம் கொள்ளாதவர்; பேரன்பு கொண்டவர். ஆண்டவர் எல்லாருக்கும் நன்மை செய்பவர்; தாம் உண்டாக்கிய அனைத்தின்மீதும் இரக்கம் காட்டுபவர். பல்லவி
ஆண்டவர் தாம் செய்யும் அனைத்திலும் நீதியுடையவர்; அவர்தம் செயல்கள் யாவும் இரக்கச் செயல்களே. தம்மை நோக்கி மன்றாடும் யாவருக்கும், உண்மையாய்த் தம்மை நோக்கி மன்றாடும் யாவருக்கும், ஆண்டவர் அண்மையில் இருக்கிறார். பல்லவி

இரண்டாம் வாசக முன்னுரை :-

வாழ்ந்தாலும் சரி, செத்தாலும் சரி, கிறிஸ்து என் வாழ்வில் மாட்சிபெற வேண்டும் என்பதே என் விருப்பம் என்று புனித பவுல் அடியார் கூறுகிறார். "வாழ்வது கிறிஸ்துவே, சாவு எனக்கு ஆதாயமே" என்ற உன்னத விசுவாச அறிக்கையையும், கிறிஸ்துவின் நற்செய்திக்குத் தகுந்தபடி வாழுமாறு விடுக்கப்படும் அழைப்பையும் இவ்வாசகத்தில் கேட்போம்.

நற்செய்திக்கு முன் வாழ்த்தொலி:-

அல்லேலூயா, அல்லேலூயா! உம் திருமகனின் சொற்களை எங்கள் மனத்தில் இருத்தும்படி ஆண்டவரே, எங்கள் இதயத்தைத் திறந்தருளும்…அல்லேலூயா.

நம்பிக்கையாளரின் மன்றாட்டுகள்:- 

1. “வாழ்விலும் சாவிலும் முழுத் துணிவுடன் கிறிஸ்துவை என் உடலால் பெருமைப்படுத்துவேன்” எனச் சூளுரைத்த பவுலடியாரைப் போல, தாயாம் திருஅவையை வழிநடத்தும் திருத்தந்தை லியோ, ஆயர் பெருமக்கள், குருக்கள், துறவியர், இறைமக்கள் ஆகிய நாங்கள் அனைவரும் கிறிஸ்துவுக்காகவே வாழ்ந்து, பயனுள்ள பணி செய்ய வேண்டுமென்று, இறைவா உம்மை மன்றாடுகிறோம்.

2. போர் பதட்டகங்களாலும், வன்முறைச் சூழல்களாலும், அமைதியிழந்து தவிக்கிற இவ்வுலகில், “கொடியவர் தம் வழிமுறையையும், தீயவர் தம் எண்ணங்களையும் விட்டுவிடுவார்களாக” என்கிற ஏசாயாவின் இறைவாக்கு நிறைவேறவும், இவ்வுலகை ஆள்பவர்களும், எங்கள் நாடு மற்றும் மாநிலத்தின் தலைவர்களும், மக்களின் நலன்களைக் காப்பதிலும், அமைதியான நல்வாழ்வை உறுதிப்படுத்துவதிலும் தங்கள் கவனத்தை செலுத்த வேண்டுமென்றும், இறைவா உம்மை மன்றாடுகிறோம்.

3. “மண்ணுலகத்திலிருந்து விண்ணுலகம் மிக உயர்ந்து இருப்பதுபோல உங்கள் வழிமுறைகளைவிட என் வழிமுறைகளும், உங்கள் எண்ணங்களைவிட என் எண்ணங்களும் மிக உயர்ந்திருக்கின்றன” என்கிற இறைவாக்கின் பொருளுணர்ந்து, எம் இளையோரும், குழந்தைகளும், மனம் போன போக்கிலும், கவர்ச்சிக்குப்பின்னும் செல்லாமல், ஆண்டவரைக் காண்பதற்கு வாய்ப்புள்ள போதே அவரைத் தேடுகிறவர்களாய் விளங்க வேண்டுமென்று, இறைவா உம்மை மன்றாடுகிறோம்.

4. “தம்மை நோக்கி மன்றாடும் யாவருக்கும், ஆண்டவர் அண்மையில் இருக்கிறார்” என்று தியானப்பாடலின் பதிலுரையில் பகர்ந்த நாங்கள், எங்களில் வலுவற்றோருக்காகவும், நலிவுற்றோருக்காகவும், நோயுற்றோருக்காகவும், தனிமைப் பட்டோருக்காகவும், எதிர்காலத்திற்கான வழிதெரியாது தவிப்போருக்காகவும் உம்மை நோக்கி மன்றாடுகிறோம். அவர்கள்மீது நீர் தாமே இரக்கம் காட்டி, ஈடேற்ற    வேண்டுமென்று, இறைவா உம்மை மன்றாடுகிறோம்.

5. இங்கே கூடியுள்ள நாங்கள் அனைவரும், நற்செய்தி உவமையில் தென்படுகிற அநீதிகுறித்து கேள்வி எழுப்புவதில் காட்டுகிற ஆர்வத்தை, நாங்கள் வாழுகிற இன்றைய சமூகத்தில் நிலவுகிற அநீதிகளைக் களைய எங்களால் இயன்றதைத் துணிவுடன் செய்வதில் காட்டவும், எங்கள் தனிப்பட்ட வாழ்வில், நீதியுள்ளவர்களாகவும் பரிவுள்ளவர்களாகவும் விளங்கி, கிறிஸ்துவின் நற்செய்திக்கு ஏற்றவாறு நடந்துகொள்ள, அருள்பெற வேண்டுமென்று, இறைவா உம்மை மன்றாடுகிறோம்.
   

https://anbinmadal.org

Print Friendly and PDF

Sunday, September 6, 2026

பொதுக்காலம் ஆண்டின் 24ஆம் ஞாயிறு 13.09.2023


பொதுக்காலம் ஆண்டின் 24ஆம் ஞாயிறு 13.09.2023


 இன்றைய நற்செய்தி வாசகங்கள்:-

சீராக்   27:30-28:7
உரோமையர் 14:7-9
மத்தேயு 18: 21-35

திருப்பலி முன்னுரை:-

ஆண்டவரின் அன்பிற்குரிய இறைமக்களே! இன்று நாம் பொதுக்காலத்தின் 24-ஆம் ஞாயிறு வழிபாட்டைக் கொண்டாடுகிறோம்.
இன்றைய திருவழிபாடு "மன்னிப்பு" என்ற உன்னதமான நற்பண்பைப் பற்றிச் சிந்திக்க நமக்கு அழைப்பு விடுக்கிறது. "ஆண்டவரே, என் சகோதரர் எனக்கு எதிராகப் பாவம் செய்தால் நான் எத்தனை முறை அவரை மன்னிக்க வேண்டும்? ஏழு முறையா?" என்று கேட்ட பேதுருவிடம், இயேசு "எழுபது முறை ஏழு முறை" என்று பதிலளித்து, மன்னிப்பிற்கு எல்லை கிடையாது என்பதை உணர்த்துகிறார்.
சீராக் நூலிலிருந்து வாசிக்கப்படும் முதல் வாசகம், ஒருவன் தன் அடுத்திருப்பவர் மீது சீற்றம் கொண்டால், அவனால் எப்படிக் கடவுளிடம் மன்னிப்பை எதிர்பார்க்க முடியும்? எனக் கேள்வி எழுப்புகிறது. நாம் வாழ்ந்தாலும் செத்தாலும் ஆண்டவருக்கே உரியவர்கள் என இரண்டாம் வாசகத்தில் புனித பவுல் அடியார் விளக்குகிறார். இறைவனிடம் நாம் பெற்றுக்கொண்ட மன்னிப்பு மிகப்பெரியது; அந்த மன்னிப்பை நாமும் பிறருக்குக் கொடுக்கும்போதுதான் இறைவனின் பிள்ளைகளாகிறோம். நம் இதயத்தில் இருக்கும் கசப்புகளையும், பழிவாங்கும் எண்ணங்களையும் களைந்துவிட்டு, ஒருவரையொருவர் மன்னிக்க வரம் வேண்டி, இத்திருப்பலியில் பக்தியுடன் பங்கேற்போம்.

முதல் வாசக முன்னுரை:-

சினம் மற்றும் சீற்றம் ஆகியவற்றை இறைவன் வெறுக்கிறார். ஒருவன் தன் அடுத்திருப்பவரிடம் கருணை காட்டாமல், கடவுளிடம் மட்டும் இரக்கத்தை எதிர்பார்ப்பது வீண் செயல். நாம் மண்ணுக்குத் திரும்புபவர்கள் என்பதை நினைவில் கொண்டு, அடுத்திருப்பவர் செய்த குற்றங்களை மன்னிக்குமாறு அழைப்பு விடுக்கும் இவ்வாசகத்தைக் கேட்போம்.


பதிலுரைப்பாடல்:-

பல்லவி: ஆண்டவர் இரக்கமும் அருளும் கொண்டவர்; பொறுமையும் பேரன்பும் உள்ளவர்.
திருப்பாடல் 103: 1-2, 3-4, 9-10, 11-12

என் உயிரே! ஆண்டவரைப் போற்றிடு! என் முழு உளமே! அவரது திருப்பெயரை ஏத்திடு! என் உயிரே! ஆண்டவரைப் போற்றிடு! அவருடைய கனிவான செயல்கள் அனைத்தையும் மறவாதே! பல்லவி

அவர் உன் குற்றங்களையெல்லாம் மன்னிக்கின்றார்; உன் நோய்களையெல்லாம் குணமாக்குகின்றார். அவர் உன் உயிரைப் படுகுழியினின்று மீட்கின்றார்; அவர் உனக்குப் பேரன்பையும் இரக்கத்தையும் மணிமுடியாகச் சூட்டுகின்றார். பல்லவி

அவர் எப்பொழுதும் கடிந்து கொள்பவரல்லர்; என்றென்றும் சினங்கொள்பவரல்லர். அவர் நம் பாவங்களுக்கு ஏற்ப நம்மை நடத்துவதில்லை; நம் குற்றங்களுக்கு ஏற்ப நம்மைத் தண்டிப்பதில்லை. பல்லவி

அவர் தமக்கு அஞ்சுவோர்க்குக் காட்டும் பேரன்பு மண்ணினின்று விண்ணளவு போன்று உயர்ந்தது. மேற்கினின்று கிழக்கு எத்துணைத்; தொலைவிலுள்ளதோ; அத்துணைத் தொலைவிற்கு நம் குற்றங்களை நம்மிடமிருந்து அவர் அகற்றுகின்றார். பல்லவி

இரண்டாம் வாசக முன்னுரை:- 

நம்மில் எவரும் தனக்கென வாழ்வதில்லை; தனக்கெனச் சாவதுமில்லை. நாம் வாழ்ந்தாலும் செத்தாலும் ஆண்டவருக்கே உரியவர்கள். வாழ்வோருக்கும் இறந்தோருக்கும் ஆண்டவராக இருக்கவே கிறிஸ்து இறந்து உயிர்த்தார் என்பதை விளக்கும் இவ்வாசகத்திற்குச் செவிசாய்ப்போம்.

நற்செய்திக்கு முன் வாழ்த்தொலி:-

அல்லேலூயா, அல்லேலூயா! ஆண்டவரே, நீர் கூறிய வார்த்தைகள் வாழ்வுதரும் ஆவியைக் கொடுக்கின்றன; நிலைவாழ்வும் அளிக்கின்றன. அல்லேலூயா.

நம்பிக்கையாளரின் மன்றாட்டுகள்:-

1.    திருச்சபைக்கும் மன்னிப்பின் பணிக்கும்: எம்திருச்சபையை வழிநடத்தும் திருத்தந்தை, ஆயர்கள் மற்றும் குருக்கள் அனைவரும், மன்னிப்பு மற்றும் ஒப்புரவுப் பணியின் வழியாகப் பிளவுபட்டிருக்கும் உலகை இறைவனிடம் சேர்த்து வைக்கும் கருவிகளாகத் திகழ இறைவா உம்மை மன்றாடுகிறோம். பதில்: இரக்கமுள்ள ஆண்டவரே, எம்மன்றாட்டைக் கேட்டருளும்.

2.    பரிபூரண மன்னிப்பைப் பெற்றிட: மற்றவர்கள் செய்த தவறுகளைச் சாகுமட்டும் இதயத்தில் சுமக்காமல், "எழுபது முறை ஏழு முறை" மன்னித்த இயேசுவின் மாதிரியைப் பின்பற்றி, எம்பங்கு மக்கள் பிறரை முழுமனதோடு மன்னிக்கத் தேவையான அருளைத் தர இறைவா உம்மை மன்றாடுகிறோம்.

3.    குடும்ப உறவுகளுக்காக: குடும்பங்களில் கணவன் மனைவிக்கு இடையிலும், பிள்ளைகள் பெற்றோரிடையிலும் ஏற்படும் மனக்கசப்புகள் நீங்கவும், ஒருவரையொருவர் ஏற்றுக்கொண்டு விட்டுக் கொடுத்து வாழும் நல்லிணக்கத்தை வழங்கிட இறைவா உம்மை மன்றாடுகிறோம்.

4.    இறந்தோருக்கும் வாழ்வோருக்கும் ஆண்டவரே: இரண்டாம் வாசகத்தில் சொன்னது போல, நாம் வாழ்ந்தாலும் செத்தாலும் உமக்கே உரியவர்கள் என்பதை உணர்ந்து, எம்மக்கள் தங்கள் வாழ்வை உமது மகிமைக்காக அர்ப்பணிக்க இறைவா உம்மை மன்றாடுகிறோம்.

5.    பழிவாங்கும் எண்ணம் மறைய: இன்றையச் சமூகத்தில் நிலவும் வன்முறைகள், பழிவாங்கும் கலாச்சாரம் மற்றும் கசப்புணர்வுகள் மறைந்து, மக்கள் ஒருவரையொருவர் மன்னித்துச் சகோதரத்துவத்துடன் வாழ அருள்தர இறைவா உம்மை மன்றாடுகிறோம்.

https://anbinmadal.org

Print Friendly and PDF

Wednesday, September 2, 2026

பொதுக்காலம் 23-ஆம் ஞாயிறு 06-09-2026

 பொதுக்காலம் 23-ஆம் ஞாயிறு 06-09-2026

இன்றைய வாசகங்கள்

எசேக்கியேல் 33: 7-9
உரோமையர் 13: 8-10
மத் 18: 15-20

திருப்பலி முன்னுரை

ஆண்டவரின் அன்பிற்குரிய இறைமக்களே! இன்று நாம் பொதுக்காலத்தின் 23-ஆம் ஞாயிறு வழிபாட்டைக் கொண்டாடுகிறோம்.
இன்றைய திருவழிபாடு "சகோதரத் திருத்தம்"  மற்றும் "அன்பு" ஆகிய இரண்டு முக்கியக் கருத்துகளை நமக்கு முன்வைக்கிறது. ஒரு சகோதரர் தவறு செய்யும்போது, அவரை ஒதுக்கிவிடாமல் அன்போடு திருத்தி நல்வழிப்படுத்த வேண்டியது நமது கடமை என்பதை முதல் வாசகமும் நற்செய்தியும் வலியுறுத்துகின்றன. மற்றவர்களுக்கு நாம் செய்ய வேண்டிய ஒரே கடன் "அன்பு செலுத்துவது" மட்டுமேயென இரண்டாம் வாசகத்தில் புனித பவுல் அடியார் விளக்குகிறார்.
"உங்களில் இருவர் மண்ணுலகில் ஒருமனப்பட்டு எதைக் கேட்டாலும் என் தந்தை அதைத் தருவார்" என்ற இயேசுவின் வாக்குறுதி, திருச்சபையின் ஒற்றுமைக்குத் தரும் பெரிய அங்கீகாரம். நாம் மற்றவர்களைக் தீர்ப்பிடுபவர்களாக இல்லாமல், அவர்களை அன்பு செய்து மீட்பின் பாதைக்கு அழைத்துச் செல்பவர்களாக மாற வரம் வேண்டி, இத்திருப்பலியில் பக்தியுடன் பங்கேற்போம்.

முதல் வாசக முன்னுரை 

ஆண்டவர் எசேக்கியேலை இஸ்ரயேல் மக்களுக்கு ஒரு 'காவற்காரராக' நியமிக்கிறார். தீயவர்கள் தங்கள் தீய வழியிலிருந்து விலகி வாழ எச்சரிக்கை செய்ய வேண்டியது ஒரு இறைப்பணியாளரின் கடமை. அந்த எச்சரிக்கையைத் தரத் தவறினால் அந்தக் குற்றத்திற்கு நாமே பொறுப்பேற்க நேரிடும் என்ற எச்சரிக்கையைத் தரும் இவ்வாசகத்தைக் கேட்போம்.

 பதிலுரைப்பாடல்

பல்லவி: உங்கள் இதயத்தைக் கடினப்படுத்திக் கொள்ளாதீர்கள்.
திபா 95: 1-2. 6-7. 8-9
வாருங்கள்; ஆண்டவரைப் புகழ்ந்து பாடுங்கள்; நமது மீட்பின் பாறையைப் போற்றி ஆர்ப்பரியுங்கள். நன்றியுடன் அவர் திருமுன் செல்வோம்; புகழ்ப் பாக்களால் அவரைப் போற்றி ஆர்ப்பரிப்போம்.  பல்லவி

வாருங்கள்; தாள்பணிந்து அவரைத் தொழுவோம்; நம்மை உருவாக்கிய ஆண்டவர்முன் முழந்தாளிடுவோம். அவரே நம் கடவுள்; நாமோ அவரது மேய்ச்சலின் மக்கள்; நாம் அவர் பேணிக் காக்கும் ஆடுகள். இன்று நீங்கள் அவரது குரலுக்குச் செவிகொடுத்தால் எத்துணை நலம்!  பல்லவி

அன்று மெரிபாவிலும், பாலைநிலத்தில் மாசாவிலும் செய்ததுபோல், உங்கள் இதயத்தைக் கடினப்படுத்திக் கொள்ளாதீர்கள். அங்கே உங்கள் மூதாதையர் என்னைச் சோதித்தனர்; என் செயல்களைக் கண்டிருந்தும் என்னைச் சோதித்துப் பார்த்தனர்.  பல்லவி      

இரண்டாம் வாசக முன்னுரை 

"உன்மீது நீ அன்புகூர்வது போல உனக்கு அடுத்திருப்பவர் மீதும் அன்புகூர்வாயாக" என்ற கட்டளைக்குள் மற்ற அனைத்துக் கட்டளைகளும் அடங்கியுள்ளன. அன்பு பிறருக்குத் தீமை செய்யாது; எனவே அன்பே திருச்சட்டத்தின் நிறைவு என்பதைப் பறைசாற்றும் இவ்வாசகத்திற்குச் செவிசாய்ப்போம்.

நற்செய்திக்கு முன் வாழ்த்தொலி

அல்லேலூயா, அல்லேலூயா! கடவுள் உலகினரைக் கிறிஸ்துவின் வாயிலாகத் தம்மோடு ஒப்புரவாக்கினார். அந்த ஒப்புரவுச் செய்தியை அவரே எங்களிடம் ஒப்படைத்தார்.அல்லேலூயா.

 நம்பிக்கையாளரின் மன்றாட்டுகள் 

 1. “என் பெயரின் பொருட்டு ஒன்றாகக் கூடியிருக்கின்றவர்களிடையே நான் இருக்கிறேன்” என்றுரைத்த இறைவா, உம் திருப்பெயரின் பொருட்டு ஒன்றாகக் கூடியிருக்கும் திருஅவை மீதும், எங்கள் திருத்தந்தை லியோ, ஆயர் பெருமக்கள், குருக்கள், துறவியர், இறைமக்கள் ஆகிய அனைவர் மீதும், உமது அருளாசியைப் பொழிய வேண்டுமென்று, இறைவா உம்மை மன்றாடுகிறோம்.

2. உலகாளும் தலைவர்களும், எமை ஆள்பவர்களும் தங்கள் இதயத்தைக் கடினப்படுத்திக் கொள்ளாமல், அமைதியை விரும்புகிறவர்களாகவும், வளர்ச்சிக்கு வித்திடுபவர்களாகவும் விளங்கிட வேண்டுமென்றும், எங்கள் தாய்த் திருநாடும், தமிழகமும், எல்லா வளமும் பெற்று முன்னேற்றப் பாதையில் பயணிக்க, அருள்தர வேண்டுமென்று, இறைவா உம்மை மன்றாடுகிறோம்.

3. பிறரை நல்வழிப்படுத்துதலின் முக்கியத்துவத்தை உணர்த்துகிற இன்றைய முதல் மற்றும் நற்செய்தி வாசகங்களுக்குச் செவிமடுத்த நாங்கள், ஆசிரியப்பணியில் ஈடுபட்டுள்ள அனைவருக்காகவும் ஜெபிக்கின்றோம்.  தம்மிடம் ஒப்படைக்கப் பட்டவர்களை, தம் சொல்லலும், செயலாலும், கற்பித்தலாலும், முன்மாதிரியினாலும் வழிநடத்துகிற ஆற்றலை அவர்கள் பெற்றிட வேண்டுமென்றும், மாதா, பிதா, குரு, தெய்வம் என்கிற மந்திரத்தின்படி வாழுகிற நல்லொழுக்கம் உள்ளவர்களாய் நாங்கள் விளங்க வேண்டுமென்றும், இறைவா உம்மை மன்றாடுகிறோம்.

4. ‘அன்பே திருச்சட்டத்தின் நிறைவு’ என்பதை உணர்ந்து, எங்கள் குடும்பங்களில் ஏற்படுகிற பிணக்குகள் அனைத்தையும், புரிதல் மற்றும் விட்டுக்கொடுத்தல் நிறைந்த பேச்சுவார்த்தையினாலும், மன்னித்து மறத்தல் என்கிற நற்பண்பினாலும் தீர்த்து, உறவுகளைப் பேணுகிறப் பண்பான குடும்பங்களாக மாற்றிட, வரமருள   வேண்டுமென்று, இறைவா உம்மை மன்றாடுகிறோம்.

5. இங்கே கூடியுள்ள நாங்கள் அனைவரும், யாருக்கும் எதிலும் கடன்படாதிருக்கவும், ஒருவருக்கொருவர் அன்பு செலுத்துவதே நாங்கள் செலுத்த வேண்டிய ஒரே கடனாய் கொண்டு வாழவும், அனைத்து கட்டளைகளும், அடுத்திருப்பவர் மீது அன்பு கூர்வதில் அடங்கியுள்ளன என்பதை உணர்ந்து, மனமொத்து சிந்திக்கவும், ஜெபிக்கவும், வாழவும் வரம்பெற வேண்டுமென்று, இறைவா உம்மை மன்றாடுகிறோம்.  

https://anbinmadal.org

Print Friendly and PDF

Sunday, August 23, 2026

பொதுக்காலம் ஆண்டின் 22ஆம் ஞாயிறு 30.08.2026

  பொதுக்காலம் ஆண்டின் 22ஆம் ஞாயிறு 30.08.2026

இன்றைய நற்செய்தி வாசகங்கள்

எரேமியா 20: 7-9
உரோமையர் 12:1-2
மத்தேயு 16:21-27

திருப்பலி முன்னுரை

ஆண்டவரின் அன்பிற்குரிய இறைமக்களே! இன்று நாம் பொதுக்காலத்தின் 22-ஆம் ஞாயிறு வழிபாட்டைக் கொண்டாடுகிறோம்.
சென்ற வாரம் இயேசுவை "மெசியா" என்று அறிக்கையிட்ட பேதுரு, இன்று இயேசுவின் சிலுவைப் பாடுகளை ஏற்க மறுக்கிறார். மானிடச் சிந்தனையோடு இருந்த பேதுருவைக் கடிந்துகொள்ளும் இயேசு, "என்னைத் பின்செல்ல விரும்பும் எவரும் தன் சிலுவையைத் தூக்கிக் கொண்டு என்னைப் பின்செல்லட்டும்" என்று சீடத்துவத்திற்குரிய நிபந்தனையை விதிக்கிறார்.
முதல் வாசகத்தில் எரேமியா இறைவாக்கினர் இறைப்பணியில் வரும் துன்பங்களைக் கண்டு புலம்பினாலும், இறைவார்த்தை அவர் இதயத்தில் "எரியும் நெருப்பாய்" இருப்பதை உணர்கிறார். இரண்டாம் வாசகத்தில், "இவ்வுலகின் போக்கின்படி வாழாமல், உங்களையே உயிருள்ள பலியாக ஒப்புக்கொடுங்கள்" என்று பவுல் அடியார் நமக்கு அழைப்பு விடுக்கிறார். வாழ்வைப் பற்றிக் கொண்டிருப்பவர் அதை இழப்பார்; கிறிஸ்துவுக்காக வாழ்வை இழப்பவர் அதைக் கண்டடைவார். இந்த மேலான உண்மையை உணர்ந்து, நம் சிலுவைகளைத் துணிவுடன் சுமக்க வரம் வேண்டி, இத்திருப்பலியில் பக்தியுடன் பங்கேற்போம்.

வாசக முன்னுரை 

முதல் வாசக முன்னுரை 

இறைவார்த்தையை அறிவித்ததால் எரேமியா இறைவாக்கினர் ஏளனத்திற்கும் துன்பத்திற்கும் உள்ளாக்கப்படுகிறார். "இனி ஆண்டவரைப் பற்றிப் பேசமாட்டேன்" என்று அவர் நினைத்தாலும், இறைவார்த்தை அவர் எலும்புகளுக்குள் எரியும் நெருப்பைப் போலத் தூண்டுகிறது. இறைவனின் அழைப்பிலிருந்து யாராலும் தப்பிக்க முடியாது என்பதை விளக்கும் இவ்வாசகத்தைக் கேட்போம்.

பதிலுரைப்பாடல்

திபா 63: 1. 2-3. 4-5. 7-8
பல்லவி: கடவுளே! என் உயிர் உம்மீது தாகம் கொண்டுள்ளது.
கடவுளே! நீரே என் இறைவன்! உம்மையே நான் நாடுகின்றேன்; என் உயிர் உம்மீது தாகம் கொண்டுள்ளது; நீரின்றி வறண்ட தரிசு நிலம்போல என் உடல் உமக்காக ஏங்குகின்றது. -பல்லவி
உம் ஆற்றலையும் மாட்சியையும் காண விழைந்து உம் தூயகம் வந்து உம்மை நோக்குகின்றேன்.  ஏனெனில், உமது பேரன்பு உயிரினும் மேலானது; என் இதழ்கள் உம்மைப் புகழ்கின்றன. -பல்லவி
என் வாழ்க்கை முழுவதும் இவ்வண்ணமே உம்மைப் போற்றுவேன்; கைகூப்பி உமது பெயரை ஏத்துவேன்.   அறுசுவை விருந்தில் நிறைவடைவது போல என் உயிர் நிறைவடையும்; என் வாய் மகிழ்ச்சிமிகு இதழ்களால் உம்மைப் போற்றும். -பல்லவி
ஏனெனில், நீர் எனக்குத் துணையாய் இருந்தீர்; உம் இறக்கைகளின் நிழலில் மகிழ்ந்து பாடுகின்றேன்.  நான் உம்மை உறுதியாகப் பற்றிக்கொண்டேன்; உமது வலக்கை என்னை இறுகப் பிடித்துள்ளது. -பல்லவி

இரண்டாம் வாசக முன்னுரை (உரோமையர் 12: 1-2)

புனித பவுல் அடியார் நம்மை ஒரு புதிய வழிபாட்டிற்கு அழைக்கிறார். விலங்குகளைப் பலியிடுவதற்குப் பதிலாக, நம்மையே 'தூய, உயிருள்ள பலியாக' இறைவனுக்கு ஒப்புக்கொடுக்க வேண்டும் என்கிறார். இவ்வுலகின் மாயைகளுக்கு அடிமையாகாமல், கடவுளுக்கு உகந்தது எது என ஆய்ந்தறிய அழைப்பு விடுக்கப்படும் இவ்வாசகத்திற்குச் செவிசாய்ப்போம்.
நற்செய்திக்கு முன் வாழ்த்தொலி
அல்லேலூயா, அல்லேலூயா! கடவுளுடைய அழைப்பு உங்களுக்கு எத்தகைய எதிர்நோக்கைத் தந்துள்ளது என்று நீங்கள் அறியுமாறு உங்கள் அகக்கண்கள் ஒளியூட்டப் பெறுவனவாக! அல்லேலூயா.

நம்பிக்கையாளரின் மன்றாட்டுகள்

1. எங்கள் திருத்தந்தை லியோ, ஆயர் பெருமக்கள், குருக்கள், துறவியர், இறைமக்கள் ஆகிய நாங்கள் அனைவரும், மனிதருக்கு ஏற்றவை பற்றியே எண்ணாமல், கடவுளுக்கு ஏற்றவைபற்றி எண்ணவும், பேசவும், செயல்படவும், அருள்தர வேண்டுமென்று, இறைவா உம்மை மன்றாடுகிறோம்.

2. பரந்த இவ்வுலகு, எம்பாரதத் திருநாடு மற்றும் எங்கள் மாநிலம் ஆகியவற்றை ஆளுகிற தலைவர்களும், குடிமக்களாகிய நாங்களும், எது நல்லது, எது உகந்தது, எது நிறைவானது என்பதைத் தேர்ந்து தெளிந்து, அமைதி, சமத்துவம், சகோதரத்துவம் ஆகியவற்றை வளர்க்கிற நேரிய பாதையில் பயணிக்க வேண்டுமென்று, இறைவா உம்மை மன்றாடுகிறோம்.

3. உலகின் கவர்ச்சிகளால் சுண்டியிழுக்கப்படும் எம்பிள்ளைகளும், இளையோரும், உலகத்தின் போக்கின்படி ஒழுகாமல், உள்ளம் புதுப்பிக்கப்பெற்று கடவுளின் திருவுளம் எது எனத் தேர்ந்து தெளிந்து, தங்கள் எதிர்கால வாழ்வை சீரிய முறையில் கட்டமைக்க வேண்டுமென்று, இறைவா உம்மை மன்றாடுகிறோம்.

4. பொருள் ஈட்டுவதிலும், உயர் பதவிகள் பெறுவதிலும், வசதிகளைப் பெருக்குவதிலும், வெளிநாடுகளில் குடியேறுவதிலும் தான் மகிழ்ச்சி அடங்கியுள்ளது எனக் கருதி, குடும்ப உறவுகளுடனும், கடவுளாம் உம்முடனும் காட்ட வேண்டிய நெருக்கத்தை தொலைத்துவிடுகிற அனைவரும், “உலகம் முழுவதையும் ஆதாயமாக்கிக்கொண்டாலும் தம் வாழ்வையே இழந்தால் கிடைக்கும் பயன் என்ன?” என்பதை உணர்ந்திட வேண்டுமென்று, இறைவா உம்மை மன்றாடுகிறோம்.

5. இங்கே கூடியுள்ள நாங்கள் அனைவரும், ஞாயிறு மற்றும் கடன் திருநாள் அனுசரிப்பில் மட்டுமே எங்கள் நம்பிக்கை என்று வாழ்வை குறுக்கிக் கொள்ளாமல், கடவுளுக்கு உகந்த, தூய, உயிருள்ள பலியாக எங்களையே படைத்து, தன்னலம் துறந்து, எங்கள் சிலுவையைத் தூக்கிக்கொண்டு உம்மைப் பின்பற்றும் உள்ளார்ந்த வழிபாடு செய்திடும் துணிவு பெற வேண்டுமென்று, இறைவா உம்மை மன்றாடுகிறோம்.  

https://anbinmadal.org

Print Friendly and PDF